پۆلیسی چەمچەماڵ تۆمەتبارێکی لەسەر سكاڵای زیاتر لە 20 هاووڵاتی دەستگیرکرد کە قەل و قازیان لێ دزرابوو.
ئەمڕۆ سێشەممە، پۆلیسی پارێزگەی سلێمانی ڕایگەیاند، دوای ئەوەی زیاتر لە 20 هاووڵاتی سكاڵایان لە نوسینگەی نەهێشتنی تاوانی چەمچەماڵ تۆماركرد كە پەلەوەریان لە جۆری (قەل و قاز) لێ دزراوە، هێزەكانی پۆلیس لێكۆڵینەوەو بەدواداچوونەكانیان دەستپێكرد.
لە ڕاگەیەندراوەکەدا هاتووە کە “بەسوود وەرگرتن لە كامێراكانی چاودێری توانرا لە لایەن مەفرەزەكانی نوسینگەی نەهێشتنی تاوانی چەمچەماڵەوە تۆمەتبار بدۆزرێتەوە و دەستگیربكرێت و دەستیش بگیرێت بەسەر چەندین قەل و قازی دزراودا”.
پۆلیس ڕایگەیاند ئێستا تۆمەتبار (ش ، أ ، غ لەدایكبووی 1989) بەبڕیاری دادوەرو بەپێی ماددەی 443 لەیاسای سزادانی عێراقی ڕاگیراوەو دانی ناوە بە تاوانەكەیدا .
