لە دوێنێوە نرخی هەر لیترێك بەنزینی نۆرماڵ لە هەولێر 50 دینار دابەزیوە ئەوەش بەهۆی زیادكردنی پێدجانی بەنزین بە یەنزینخانەكان و نرخی هەر لیترێكیش بە 750 دینار بە شۆفێران دەفرۆشرێت.
نرخی بەنزینی نۆڕماڵ لە هەولێر دادەبەزێت و ئەنجوومەنی بەنزینخانەكانیش هۆكارەكە بۆ ئەوە دەگەڕێننەوە، كە ڕێژەی ئەو بەنزینەی ڕۆژانە دەدرا بە بەنزینخانەكان زیاد كراوە، لەمەودوا ڕۆژانە 20 تانكەر بەنزین كە دەكاتە 720 هەزار لیتر لە هەولێر دەدرێت بە بەنزینخانەكان و هەر لیترێك بە 750 دینار بە شوفێران دەفرۆشرێت.
جەنگی مەجید، سەرۆكی ئەنجوومەنی بەنزینخانەكانی هەولێر ڕایگەیاند، ئەو بەنزینە نۆڕماڵەی، كە ئێستا لە زۆرینەی بەنزینخانەكانی هەولێر بەردەستە، كوالێتییەكی زۆر باشی هەیە و هیچ كێشەیەك بۆ ئۆتۆمبێل دروست ناكات.
بەپێی بڕیاری سامانە سروشتییەكانی هەرێم، ئەو بەنزینە نۆرماڵە نرخی یەك لیتری بە 750 دینار جێگیركرا و دەدرێت بە شۆفێران و بەوەش خواست لەسەر بەنزینی بازرگانی كەم دەبێتەوە و نرخەكەی زیاتر دادەبەزێت.
دوێنێ هەینی، پەیامنێری (خەڵك) لە هەولێر ڕایگەیاند، نرخی بەنزین دابەزیوە و بۆ هەر لیترێك 50 دینار هەرزان بووە.
