وتەبێژی وەزارەتی دەرەوەی ئەمریکا ڕایگەیاند، کار بۆ کەمکردنەوەی گرژییەکانی نێوان تورکیا و هەسەدە دەکەن. دووپاتیشی کردەوە، “ئێمەش لەگەڵ دەرکردنی چەکدارە بیانییەکانین”.
ماتیو میللەر، وتەبێژی وەزارەتی دەرەوەی ئەمریکا لە کۆنفرانسێکی ڕۆژنامەوانیدا، لەبارەی ئاڵۆزییەکانی سەر سنووری کۆبانێی ڕۆژئاوای کوردستان، ڕایگەیـاند: “لەگەڵ هێزەکانی سووریای دیموکرات (هەسەدە) و تورکیا لە گفتوگۆداین، نەک ئێمە، تەواوی هاوبەشەکانمان بەهەمان شێوە قسە لەگەڵ تورکیا دەکەن”.
وتەبێژی وەزارەتی دەرەوەی ئەمریکا باسی لەوەشکرد: “کار دەکەین بۆ کەمکردنەوەی گرژییەکان، گرژی و ئاڵۆزی لەمێژینە لە نێوان تورکیا و ئەم گرووپانەدا هەیە. بۆیە ئاسان نییە و ئێمەش بەدوای دۆزینەوەی ڕێگەچارەیەکین”.
وتیشی: “ئەوەی ئێمە دەمانەوێت دامەزراندنی حکومەتێکی نیشتمانی سووریایە کە هەموو گرووپە نەتەوەییە جیاوازەکانی ناو سووریا لەخۆبگرێت و لە کۆتاییدا هیچ میلیشیایەکی دیکەت پێویست نابێت”.
وتەبێژی وەزارەتی دەرەوەی ئەمریکا لە بەشێکی دیکەی قسەکانیدا ئەوەشی خستەڕوو “ئێمەش لەگەڵ دەرکردنی چەکدارە بیانییەکانین”.
