بەپێی بڕیاری ئەنجوومەنی وەزیرانی هەرێم، پێشنیاری هاوبەشی وەزارەتی دارایی هەرێم و ئەنجوومەنی گشتی ڕاژە بۆ هاوتاکردنی ناونیشانە وەزیفییەکان لە هەرێمی کوردستان لەگەڵَ حکومەتی فیدڕاڵَ پەسەند دەكرێت.
ڕۆژی چوار شەممەی پێشوو، ئەنجوومەنی وەزیرانی هەرێم كۆبووەوە، كە تیایدا لە چوارچێوەی یەکخستنەوەی ڕێکار و ڕێسا داراییەکان لە نێوان هەردوو حکومەتی هەرێم و حکومەتی فیدڕاڵ، وەزیری دارایی و ئابووری ، پێشنیاری هاوبەشی وەزارەتەكەی و ئەنجوومەنی گشتیی ڕاژەی بۆ هاوتاکردنی ناونیشانە وەزیفییەکان لە هەرێمی کوردستان لەگەڵَ حکومەتی فیدڕاڵَ خستەڕوو.
بەپێی ڕاگەیەنراوی حكومەتی هەرێم، پێشنیارەكە بۆ جێبەجێکردنی خشتەی نوێی ناونیشانە وەزیفیەکانە، کە لە یاسای ساڵی 2024 ی هەموارکراوی میلاک هاتوون.
ئاماژە بەوەشكراوە، لە دوای گفتوگۆ، ئەنجومەنی وەزیران وەزارەتەکانی ڕاسپارد بەداداچوون بۆ ئەم هەموارە بکەن، کە لە خشتەی ناونیشانە وەزیفیەکانی یاسای میلاک هاتووە، بە ڕەچاوکردنی تایبەتمەندیی دامەزراوەکانی هەرێم و بەرژەوەندی فەرمانبەران تا لە کۆبوونەوەکانی داهاتوو بڕیاری پێویستی لەبارەوە بدرێت.
