وتەبێژی هاتو,چۆی گەرمیان ڕایدەگەیەنێت، لەمەودوا هەر ئۆتۆمبێلێكی بێ سەرەتا یان (مەلیكە) بكەوێتە مەفرەزەكانیانەوە دەستی بەسەردا دەگرن و دەشڵێت: “لەماوەی ڕابردوودا ٨١٥ ئۆتۆمبێل كۆدیان پێدراوە”.
سامان عەلی، وتەبێژی هاتووچۆی گەرمیان لە لێدوانێكی ڕۆژنامەوانیدا ڕایگەیاندووە، ڕۆژانە ڕێژەیەكی بەرچاو ئۆتۆمبێلی بێ سەرەتا و خوار مۆدێل لە پارێزگاكانی باشوور و خوارووی عیراقەوە دەهێندرێنە گەرمیان و دەفرۆشرێنەوە، بۆیە ئیتر هەر ئۆتۆمبێلێكی خوار مۆدێل و بێ سەرەتا بكەوێتە مەفرەزەكانیانەوە دەستی بەسەردا دەگرن.
ئاماژەی بۆ ئەوەشكردووە، كە لەماوەی ڕابردوودا ٨١٥ ئۆتۆمبێل كۆدیان پێدراوە بۆ كۆكردنەوەی ئامارییان و بەخاوەنەكانیشیان وتراوە، كە ئەو ئۆتۆمبێلانە بەكارنەهێنن تا وەزارەتی ناوخۆ چارەسەریان بۆ دەدۆزێتەوە، بۆیە ئەو ئۆتۆمبێلانەشی ئەو كۆدەیان بۆ كراوە هەر دەستیان بەسەردا دەگیرێت.
