بەپێی ئەو ئامارانەی سایتی شەفافیەت بۆ داهاتی سلێمانی بڵاویكردۆتەوە، داهاتی ئەمڕۆی سلێمانی بۆ نیوە كەمی كردووە و بەرپرسانی یەكێتی و پارتیش باس لەوە دەكەن، ڕێككەوتنی نوێ بۆ چارەسەری قەیرانەكانی حكومڕانی لە هەرێم ئەنجام دەدەن.
سایتی شەفافیەت، كە لەلایەن جێگری سەرۆك وەزیرانی هەرێمەوە بۆ ئاشكراكردنی داهاتی سلێمانی و هەڵەبجە و ئیدارەكانی گەرمیان و ڕاپەڕین دروست كراوە، ئاماژەی بەوەكردووە، داهاتی ئەمڕۆ بەرامبەر بە دوێنێ ٥٣٪ كەمی كردووە و كۆی داهاتی ئەم هەفتەیە گەیشتۆتە ١٥ ملیار و ٢٠٤ ملیۆن و ٤٢٨ هەزار دینار.
بەپێی ئامارەكە، داهاتی دوێنێ سێ شەممە ٢ ملیار و ٦٠٥ ملیۆن و ٩٦٩ هەزار دینار و ئەمڕۆ چوار شەممە كەمی كردووە بۆ ملیارێك و ٢٠١ ملیۆن و ٢٩٥ هەزار دینار.
ڕاگەیاندنی داهاتی ڕۆژانەی سلێمانی لەكاتێكدایە، كە تیمی یەكێتی لە حكومەتی هەرێم و بەشێكی پەرلەمانتاران باس لەوە دەكەن، كە “گەمارۆی ئابووری و دارایی خراوەتە سەر زۆنی سلێمانی” و بەو هۆیەشەوە یەكێتی نیگەرانییەكانی بەردەوام بەرامبەر بە پارتی بڵاودەكاتەوە و چەند مانگێكە قوباد تاڵەبانی، جێگری سەرۆك وەزیران بەشداری كۆبوونەوەكانی ئەنجوومەنی وەزیران ناكات.
لە چەند ڕۆژی ڕابردووشدا بەرپرسانی یەكێتی و پارتی ڕایانگەیاند، كە كۆبوونەوەی دوور لە چاوی میدیاكان ئەنجام دراوە و بڕیارە ئەو دوو حزبە پەیوەندییەكانیان ئاسایی بكەنەوە و كۆبوونەوەی مەكتەبی سیاسی بكرێت بە مەبەستی ئەنجامدانی ڕێككەوتنی نوێ لەنێوانیان.
