فەرماندەی گشتی هێزەکانی سووریای دیموکرات ڕایگەیاند، هەوڵی پاراستنی گەلەکەمان و دوورخستنەوەیان بە سەلامەتی لە ناوچەکانی تەل ڕەفعەت و شەهبا بەرەو ناوچە سەلامەتەکان دەدەین و هێزەکانمان لە چەند بەرەیەکەوە ڕووبەڕووی هێرشی چڕ بوونەتەوە.
ئەمڕۆ دووشەممە، مەزڵوم عەبدی، فەرماندی گشتی هێزەکانی سووریای دیموکرات پەیامێکی دەربارەی دۆخی ناسەقامگیری سووریا بڵاوکردەوە و ڕایگەیاند، ڕووداوەکان لە باکووری ڕۆژئاوای سووریا بە خێرایی و لەناکاو پەرەیان سەند، کە هێزەکانمان لە چەند بەرەیەکەوە ڕووبەڕووی هێرشی چڕ بوونەتەوە. لەگەڵ هەرەسهێنان و کشانەوەی سوپای سوریا و هاوپەیمانەکانی، دەستوەردانمان کرد بۆ کردنەوەی ڕێڕەوێکی مرۆیی لە نێوان ناوچەکانمان لە ڕۆژهەڵات و حەلەب و ناوچەی تەل ڕەفعەت بۆ پاراستنی گەلەکەمان لە کۆمەڵکوژی، بەڵام هێرشی ئەو گروپە چەکدارانەی کە لەلایەن تورکیای داگیرکەرەوە پاڵپشتی دەکران ئەم ڕێڕەوەیان پچڕاند.
مەزڵوم عەبدی دەڵێت: “هێزەکانمان ئازایانە لە حەلەب و تەل ڕەفعەت و شەهبا بوێرانە بەرگریان لە گەلەکەمان کرد”.
وتیشی: “ئێمە کاردەکەین بۆ پەیوەندیکردن لەگەڵ هەموو لایەنە کاریگەرەکانی سووریا بۆ پاراستنی گەلەکەمان و دوورخستنەوەیان بە سەلامەتی لە ناوچەکانی تەل ڕەفعەت و شەهبا بەرەو ناوچە سەلامەتەکان لە باکووری ڕۆژهەڵاتی وڵات”.
فەرماندەی گشتی هێزەکانی سووریای دیموکرات جەختیشیکردەوە کە هاوکات لەگەڵ هەڵەکانیان بۆ دەربازکردنی هاووڵاتییان لەو ناوچانە: “لە هەمان کاتیشدا بەرخۆدانی هێزەکانمان بۆ پاراستنی گەلەکەمان لە گەڕەکە کوردییەکانی حەلەب بەردەوامە”.
