وەزارەتی سامانە سروشتییەکان ئەنجامی کۆبوونەوەی لەگەڵ بریکاری نەوتی عێراق بە وەکالەت ئاشکرا کرد و دەڵێت” بڕیارە بەشێک لە بەنزین بۆ هەرێم بنێردرێت”.
وەزارەتی سامانە سروشتییەکانی حکومەتی هەرێم بڵاویکردەوە، ئەمڕۆ پێنچشەممە ٢٠٢٤/١١/٢٨ فارس عیسا سەرۆکی نوێنەرایەتی حکومەتی هەرێمی کوردستان و عەلی معارج بریکاری وەزاتی نەوت بۆ کاروباری دابەشکردن و وەزیر بەوەکالەت کۆبوونەوە و سێ بابەتی سەرەکی لە کۆبوونەوەکەدا باسکرا و بڕیاری لەبارەوەدرا.
بەپێی بڵاوکراوەکەی وەزارەتی سامانە سروشتییەکان، بەغدا بریاریداوە نەوتی سپی دەستبەجێ بۆ هەرێم بنێردرێت و بڕەکەی دیاریدەکرێت، هاوکات دوای پڕکردنەوەی پێویستی ناوەراست و خواروی عێراق بەشێک لە بەنزینی عێراقی بۆ هەرێم بنێردرێت.
دەقی ئەو بڕیارانەی لەسەری ڕێکەوتن:
١- دابەشکردنی بەشی هەرێمی کوردستان لە نەوتی سپی کە بڕی ٥٠ ملیۆن لیترە.
٢- تەرخانکردنی بەشێک لە بەنزینی نۆرماڵ بۆ هەرێمی کوردستان.
٣- هەژمارکردنی لیتری قیاسی نەک قەبارەی سروشتی بۆ ناردنی بەشی هەرێم لە نەوتی سپی..
لە ئەنجامدا بڕیاردرا:
١/بەشی هەرێم لە نەوتی سپی دەست بەجێ بنێردرێت.
٢/چاوەڕێ بکرێت بارودۆخی پارێزگاکانی ناوەڕاست و باشور بۆ بەرهەمی بەنزین باش بێت تاکو بەشێک لە بەنزین بۆ هەرێم تەرخان بکرێت.
٣/ دیراسەکردنی بابەتی لیتری قیاسی و قەبارەی سروشتی لە وەزارەت تاکو بڕیاری لەسەر بدرێت.
