ڕەنگین عەبدوڵا – چالاکوان
توندوتیژی پێش ئەوەی برینی سەر جەستە و زامی پڕ ئازاری لەش بێت، بەرلەوەی هاوار و ناڵەی دەرونێکی شەکەت و هەگبەی خەمێکی قوڵ بێت، کەلتورێکی چەپەڵە و لە چاوتروکانەوە لە دایک دەبێت، لە هەموو ماڵ و گەڕەکێک، لە پۆل و قوتابخانە و زانستگە، لە چایخانە و کافێ و چێشتخانە و هەموو خانەکانی تری نیشتمان بە جۆرێک لە جۆرەكان خۆی بەرهەم دێنێتەوە، ئەمە بۆتە کەلتوور و کەلتورێکی قێزەونیشە، ناشرینیەکەشی لەوەدایە، کامەیان شانامەی مرۆڤدۆستی و رەفتار باڵایی دووپات دەکەنەوە، لە هەمووان دڵڕەقترن.
جارێک خانمە ئەکتەری تورک (بیرین سات) بۆ ئازاری مردنی کیژە کوردێك نوسیبووی: ئێمە واین، هەر منداڵین ڕوبەڕووی ئازاری چاوی شۆفێری تەکسیەکان دەبینەوە و گەنجەکانی کۆڵان تەنگ بە ڕوحمان هەڵدەچنن، لە شوێنە گشتیەکان دەکەوینە بەر پەلاماری زمان و تانەو تەشەری خەڵکەوە، ئەم تارماییە بۆ ئەبەد بەشوێنمانەوەیە و هەر دەمێنێت، قەدەرێکی سەیری دنیای ئێمە ئەم توندوتیژیەیە!.
ژیان و گیانی مرۆڤ موقەدەسە، ڕۆح و دەروونی ژن پیرۆزە، لە کچ و خوشکەوە، بۆ دایک و هاوسەر، هەموویان لە پڕۆڤەی ئەوەدان لە گەورەییدا بەهەشت بکەوێتە ژێر پێکانیانەوە، بەڵام لایەنگرانی عەقڵ و ئاکاری شەیتانیی، بەبێ پاساو و بیانو، بێ هۆکار و پاڵنەر، سات بە سات و ڕۆژ بە ڕۆژ لە پەیڕەوکردنی توندوتیژی و پەلاماردانی دایکانی بەهەشت بەردەوامن، ئەوانەی چێژ لە توندوتیژی دەبینن، ئەوانەن کە ڕقیان لە ژیان و گیان و ئازادیی دەبێتەوە، ئەفسوس هەر دەمێنێت.
25 ی نۆڤەمبەر، ڕۆژی وەستانەوەیە لەبەرامبەر توندوتیژی، با هەمووان لە زمان و ئەخلاق و ڕەفتارەوە پابەندی مۆڕاڵی ناتوندوتیژی بین.
