مەسرور بارزانی، سەرۆکی حکومەتی هەرێمی کوردستان ڕایگەیاند، عێراق بووەتە مەترسیدارترین کەناڵی گواستنەوەی ماددە هۆشبەرەکان، دەشڵێت: “ئێمە بە هەموو هەوڵێکمانەوە ڕێگە لە تەشەنەنەکردنی ماددەی هۆشبەر دەگرین”.
مەسرور بارزانی، لە ڕێوڕەسمی دانانی بەردی بناغەی سەنتەری هۆشیاری و شیاندنەوەی ئالوودەبووانی ماددە هۆشبەرەکان لە شاری هەولێر، لە وتارێکدا ڕایگەیاند، “دروستکردنی ئەم سەنتەرە، بەشێکە لە هەوڵەکانمان بۆ یارمەتیدانی تووشبووان و ئالوودەبووان و هاوکاریکردنیان بۆ دووبارە شیاندنەوەیان و گەڕاندنەوەیان بۆ ژیانی ئاسایی. هەروەها ئەم سەنتەرە هەوڵێکە بۆ زیاتر هۆشیاریی لەبارەی مەترسی و لێکەوتە و کارەساتی بڵاوبوونەوەی ماددەی هۆشبەر”.
سەرۆکی حکومەتی هەرێم داواشی لە حکومەتی عێراق کرد ڕێگەی توند بگرنەبەر بۆ ڕووبەڕوبوونەوەی بازرگانانی ماددەی هۆشبەر و وتی: “بەهەموو هەوڵێکمانەوە کار لەسەر قەڵاچۆکردنی ماددە هۆشبەرەکان دەکەین”.
باسی لەوەشکرد: “ماددە هۆشبەرەکان هەڕەشەیەکی مەترسیدارە بۆسەر کۆمەڵگەکەمان، پێویستە بە توندترین شێوە ڕووبەڕووی مافیاکانی ماددە هۆشبەرەکان ببینەوە”.
