بافڵ تاڵەبانی: بەڵێنەکانمان جێبەجێ دەکەین

سەرۆکی یەکێتی جەختی لە جێبەجێکردنی ئەو بەڵێنانە کردەوە کە لە ڕابردوودا بە خەڵکیان داوە.

ئەمڕۆ پێنجشەممە، بافڵ تاڵەبانی، سەرۆکی یەکێتیی نیشتمانیی کوردستان لە یادی “ڕۆژی شەهیدانی یەکێتی”دا پەیامێکی بڵاوکردەوە و ڕایگەیاند، بیرکردنەوە لە ڕابردوو شەهیدەکان: “سوورترمان دەكات تاوەكو لە داهاتووشدا بە هەمان رۆحییەتی یەكێتییانەوە بەگژ نادادی و نایەكسانیدا بچینەوە و ئەو بەڵێنەی بە خەڵكمان داوە، پارێزگاریی لێبكەین و هەنگاو بۆ داهاتوویەكی سەقامگیرتر و شەرەفمەندانەتر بنێین”.

وتیشی، بە جێبەجێکردنی ئەو بەڵێنانە: “رۆحی شەهیدانمان شاد دەكەین و كوردستان بەرەو قۆناغێك ئاڕاستە دەكەین كە شایستەی ئەو رووبارە خوێنەی رۆڵەكانمان بێت”.

دەقی پەیامەکەی بافڵ تاڵەبانی:

ئەمڕۆ بە شانازی و وەفاداریی هەمیشەییمانەوە یادی شەهیدانمان دەكەینەوە و رۆژی شەهیدی یەكێتی بەرز رادەگرین. سڵاو و خۆشەویستیی زۆرمان بۆ كەسوكارە سەربەرزەكانیان دەنێرین و لەبەرامبەر دڵسۆزی و خۆڕاگرییاندا سەری رێز دادەنەوێنین.