ئاژانسی نێودەوڵەتی ڕۆیتەرز بۆ هەواڵەكان ڕایدەگەیەنێت، ئابوری بەریتانیا دووچاری خاوبوونەوەیەكی هاوشان بە هەڵاوسان دەبێت لە بەهای دراو لەماوەی ئەمساڵ، ئاماژە بە بەرزبوونەوەی ڕێژەكەشی دەكات بۆ سەرو 10% كە بەپێی ئاژانسەكە بێت، گەورەترین تەنگژەی گوزەران لەماوەی دەیان ساڵی ڕابردوودا لە وڵاتەكەدا دەخولقێنێت.
ڕۆیتەرز لە زاری سەنتەری “نیلسین ئای كیو” بۆ توێژینەوەكانی بازاڕ بڵاویكردەوە:”خاوبوونەوە و هەڵاوسان لە بازاڕی بەریتانی لەماوەی چەند ڕۆژی داهاتوودا لە بازاڕەكانی بەریتانیا دەردەكەون، لەگەڵ پاشەكشەكردنی توانای هاووڵاتیان لە بازاڕكردن و دابەزینی توانای كڕینیان، ئەمەش بە گەورەترین پاشەكشە دادەنرێت لەسەر ئاستی گوزەران كە بەریتانیا لە ساڵی 1950وە بەخۆوەی دەبینێت”.
ڕۆیتەرز نوسیویەتی:”ڕەوشی ژیان لەماوەی ساڵی 2023 بۆ خێزانە بەریتانییەكان زۆر قورس دەبێت، بەو هۆیەی 33%ی خەڵك توانای ئەوەیان نابێت پێداویستییە سەرەكییەكانی ژیان دابین بكەن و تەنیا 5%ی خێزانەكان دەتوانن بە باشی بژین، بەڕەچاوكردنی ئەوەی كە بەردەوام ئەوانیش دەبێت ئاگایان لە گیرفانیان بێت”.
وەك ڕۆیتەرز دەڵێت:”نرخی كاڵا و خۆراك لەم مانگەدا بەرزبوونەوەی بەخۆوەبینی و ڕێژەی بەرزبوونەوەكەش گەیشتە 10.9%، ئەمەش بووە مایەی كەمبوونەوەی ڕێژەكانی كڕین و پاشەكشەكردنی توانای هاووڵاتیانی بەریتانی لەڕووی كڕینی پێداویستییەكانیان، بە تایبەت پێداویستییە خۆراكییەكان كە بە سەرەكیترین پێداویستییەكانی ژیانی ڕۆژانە دادەنرێت و خۆی لە مەترسیدا دەبینێتەوە، بەهۆی ئەو تەنگژە ئابوورییەی ڕووی لە شانشینی یەكگرتوو كردووە”.
بەپێی زانیارییەكانی ئاژانسەكە، تەنگژەی ئابووری بەریتانیا لەمساڵدا بەردەوام دەبێت و بەرز و نزمی بەخۆوەدەبینێت، پێشبینیش دەكرێت لەگەڵ یەكەم مانگی ساڵی 2024ی داهاتوو، كرانەوە بەخۆوەببینێت.
