بەپێی لێدوانەکانی ڕەجەب تەیب ئەردۆغان، سەرۆکی تورکیا، ئەنكەرە فشار دەکاتە سەر واشنتۆن تاوەکو دووبارە پێداچوونەوە بکاتەوە بە پشتیوانییەکانی بۆ هێزە کوردییەکان لە سوریادا “ڕۆژئاوای كوردستان”، ئەردۆغان جارێکی دیکە ئاماژەیدا بە ئەگەری ئەنجامدانی هێرش دژی کوردەکانی سوریا، بەڵام لەناوخۆی وڵاتەكەیدا دەیەوێت دەستبكاتەوە بە پڕۆسەی ئاشتی و ڕێككەوتن لەگەڵ كورد.
ئەم هەوڵەی ئەردۆغان بۆ دووبارە هێرشكردنە سەر خاكی ڕۆژئاوای كوردستان و هێزە كوردییەكان لەكاتێكدایە، كە دۆناڵ ترەمپ جارێكی دیكە بووە بە سەرۆكی ئەمریكا لەكاتێكدا لە خوولی ڕابردووی سەرۆكایەتیدا بەشێكی هێزەكانی لە ڕۆژئاوای كوردستان كشاندەوە و دەستی توركیای واڵا كرد بۆ هێرشكردنە سەر ڕۆژئاوای كوردستان و داگیركردنی بەشێكی.
ئەردۆغان لەلایەك بانگەشەی دەستپێكردنەوەی پڕۆسەی ئاشتی لەگەڵ كورد لەناوخۆی وڵاتەكەی دەكات، بەڵام لەلایەكی دیكەوە دەیەوێت فشار بخاتە سەر ئەمریكا و ڕازی بكات بە دووبارە هێرشكردنە سەر ڕۆژئاوای كوردستان، لەكاتێكدا هەردوو هێزە كوردییەكانی ناوخۆی وڵاتەكەی “باكووری كوردستان” و ڕۆژئاوای كوردستان تۆمەتبار دەكات بەوەی سەر بە “پەكەكە”ن، بەڵام دەشیەوێت لەڕێگەی ڕازی كردنی عەبدوڵا ئۆجالان، ڕێبەری زیندانی كراوی پەكەكە و ئازادكردنی یان سووك كردنی سزاكەی بۆ بەندی لە ماڵەوە لەجیاتی زیندان ڕازی بكات بەوەی پەكەكە هەڵبوەشێنێتەوە و وتویەتی، “كورد و تورك خاوەنی توركیان”.
ڕۆژنامەی (میلیەت) لە زاری هاکان فیدان، وەزیری دەرەوەی تورکیا بڵاویکردەوە “ئێمە هەمیشە بیری هاوتا ئەمەریکاییەکانمانی دەخەینەوە، کە پێویستە هاریکارییەکانییان لەگەڵ ڕێکخراوە تیرۆریستییەکەدا لە سوریا ڕابگرن.”
وتی، “گفتوگۆکانمان لەسەر ئەم پرسە زیاتر بووە. دەبینین ئەمریکاش سوورە لەسەر گفتوگۆی زیاتر لەو بارەیەوە.”
ڕۆژی یەک شەممە ئەردۆغان وتی، “تورکیا دەکرێت هێرشێکی نوێ بکاتە سەر باکووری سوریا (ڕۆژئاوای كوردستان) تاوەکو ناوچەی نوێی پارێزراو بە درێژایی سنوورەکەی دروست بکات، ئەوەش دوای ئەوەی کە ڕۆژی هەینی وتی، لەگەڵ سەرۆکی هەڵبژێردراوی ئەمریکا دانۆڵد ترەمپ-دا تاوتوێی ئەگەری کشانەوەی هێزەکانی ئەمریکا دەکات لە سوریا”.
بەپێی ڕاپۆرتێكی (دەنگی كوردی ئەمریكا) یەکێک لە هۆکارەکانی کەوتنەوەی گرژی لە پەیوەندییەکانی نێوان ئەمریکا و تورکیادا پشتیوانییەکانی ئەمریکایە بۆ هێزەکانی یەپەگە، هێزەکانی یەپەگە هاوپەیمانی سەرەکی ئەمریکان لە شەڕی دژ بە داعشدا لە سوریا. ئەنکەرە ئەو هێزانە بە “تیرۆریست” ناودەبات و دەڵێت: بەشێکن لە پارتی کرێکارانی کوردستان.
تورکیای ئەندام لە ناتۆ لەم چەند ساڵەی ڕابردوودا چەندین هێرشی ئاسمانی کردووەتە سەر یەپەگە و بەردەوام هەڕەشەی ئەنجامدانی هێرشی زیاتری کردووە.
ڕۆژی یەک شەممە ئەردۆغان وتی، ئەو هێرشانە بوونە هۆی دروستبوونی ناوچەی پارێزراو لە سوریادا کە “هەوڵەکانی بۆ گەمارۆدانی تورکیا لە سنوورەکانی باشوورەوە پوچەڵ کردووەتەوە، تورکیاش سوورە لەسەر ئەوەی بە تەواوەتی پەیوەندییەکان لەگەڵ ڕێکخراوە تیرۆریستییەکاندا بپچڕێنێت.”
وتیشی، “لە ماوەی داهاتوودا ناوچە پارێزراوەکە تەواو دەکەین، کە بە درێژایی سنوورەکەمان دروستمان کردووە.”
لەم چەند مانگەی ڕابردووشدا ئەردۆغان هەوڵیداوە پەیوەندییەکانی لەگەڵ سەرۆکی سوریا بەشار ئەسەد چاک بکاتەوە، دوای دەیەیەک لە پچڕاندنی پەیوەندییەکان لەگەڵ سوریادا.
ئەنکەرە گلەیی لەوە کردووە، کە دیمەشق وەڵامی هەوڵەکانی نەداوەتەوە بۆ دووبارە لە یەک نزیکبوونەوە، ئەوەش دوای ئەوەی ئەردۆغان لە مانگی حەوت-دا وتی، “بانگهێشتی ئەسەد دەکات بۆ تورکیا تاوەکو گفتوگۆ بکەن”. ئەسەد وتی، “ئەو هەوڵانە هیچ ئەنجامێکییان نەبووە و دیمەشق دەیەوێت هێزەکانی تورکیا لەسەر خاکی سوریا بکشێنەوە”.
