دەستەی خانەنشینی عێراق کتاییهاتنی ڕێکارەکانی دابەشکردنی مووچەی تشرینی دووەمی ڕاگەیاند و لە هەرێمیش هێشتا مووچەی تشرینی یەکەم دابەش نەکراوە.
ئەمڕۆ یەکشەممە حیسام عەبدولستار، بریکاری سەرۆکی دەستەی خانەنشینی عێراق رایگەیاند، دەستەکەیان ڕێکارەکان و ناردنی داتاکانی خەرجکردنی مووچەی خانەنشینانی بۆ مانگی تشرینی دووەم تەواو کرد.
هۆکاری دواکەوتنی ڕێکارەکانی گەڕاندەوە بۆ ئەوەی ڕۆژانی یەک و دووی ئەم مانگە پشوو بوون و دواتر ڕێکارەکان بە هەماهەنگی لەگەڵ فەرمانگەی ژمێریاری وەزارەتی دارایی تەواوکران.
دەستپێکردنی دابەشکردنی مووچەی مانگی تشرینی دووەمی عێراق لە کاتێکدایە هێشتا مووچەی تشرینی یەکەم لە هەرێمی کوردستان دابەش نەکراوە و ئەمڕۆ وەزارەتی دارایی هەرێم ڕایگەیاند لیستی مووچەیان بۆ وەزارەتی دارایی عێراق ناردووە.
