یاریدەدەری سەرۆك وەزیرانی هەرێم ڕایدەگەیەنێت، هەر فەرمانبەرێك تا 20ی مانگی داهاتوو بایۆمەتری نەكات مووچەكەی ڕادەگیرێت و دەشڵێت: بۆ مووچەی ئەم مانگە پێویستمان بە 996 ملیار دینارە.
رێباز حەملان، یاریدەدەری سەرۆک وەزیرانی هەرێم ڕایگەیاند، شاندی وەزارەتی دارایی هەرێم لە بەغدان و لیستی مووچەی مانگی 10 یان لەگەڵ خۆیان بردووە.
ڕاشیگەیاندووە، ئەو تێبینیانەی لە لیستی مووچەی مانگەکانی دیکەدا هەبوون کەمێکیان ماون و زۆرینەی چارەسەرکراون.
ئاشكراشی كرد، بەپێی لیستەکە بۆ دابەشکردنی مووچەی مانگی 10 پێویستمان بە 996 ملیار دینارە.
جەختیشی كردۆتەوە، بڕیارێكمان دەركردووە لە وەزارەتی دارایی و ئابووری، كە ئەو فەرمانبەرانەی تاوەكو 20ی 11 بایۆمەتری نەكەن مووچەكانیان ڕادەگیرێت.
