خۆبەڕێوەبەریی باکوور و ڕۆژهەڵاتی سووریا ڕایگەیاند تورکیا زیاتر لە هەزار جار ناوچەکانیانی کردووەتە ئامانج و بەهۆیەوە 82 کەس بوونەتە قوربانی و ئاو و کارەبای زیاتر لە 150 هەزار خێزانیش بڕاوە.
ئەمڕۆ یەکشەممە، خۆبەڕێوەبەریی باکوور و ڕۆژهەڵاتی سووریا ڕاگەیەندراوێکی دەربارەی زیانەکانی بۆردومانەکانی تورکیا بڵاوکردەوە کە ماوەی چوار ڕۆژە بەردەوامن.
لە ڕاگەیەندراوەکەدا هاتووە، تورکیا لە هێرشە ئاسمانییەکانیدا ژێرخان و ناوچەکانی نیشتەجێبوونی هاووڵاییانی لە جزیرە، کۆبانێ، منبج، تەل تەمر و عەین عیسا کردووەتە ئامانج و گروپە چەکدارەکانی سەر بە تورکیاش بەردەوامن لە هێرشکردنە سەر مەدەنییەکان و ڕاگواستنی دانیشتووانی عەفرین.
ئەوەشی خستەڕوو کە هێرشەکانی تورکیا مەترسییەکی گەورە لەسەر دۆخی مرۆیی و خزمەتگوزاری و کۆمەڵایەتیی ناوچەکانی خۆبەڕێوەبەریی دروست دەکەن و دەرفەتیش دەدەنە دەست گروپە تیرۆریستییەکان و چەتەکان بۆ تێکدانی سەقامگیریی و خۆڕێکخستنەوەیان بۆ هێرشکردنە سەر ناوچەکانی خۆبەڕێوەبەریی.
خۆبەڕێوەبەریی باکوور و ڕۆژهەڵاتی سووریا ڕاشیگەیاند لە ماوەی چوار ڕۆژی ڕابردوودا تورکیا هەزار و 31 هێرشی کردووەتە سەر ناوچەکانیان و بە هۆیەوە 17 کەس گیانیان لەدەستداوە و 65ی دیکەش برینداربوون.
ڕوونیشیکردەوە کە بە هۆی بۆردومانکردنی وێستگەکانی بەرهەمهێنانی کارەبای قامیشلۆ، کۆبانێ، عامودێ و درباسیە، کارەبای زیاتر لە 150 هەزار خێزان بڕاوە و ناشتوانرێت ئاویان بۆ دابین بکرێت.
پێشتریش ئاژانسی هەواڵی هاوار بڵاویکردبووەوە کە 30 دامەزاوەی نەوت و غاز و کارەبا بە هۆی بۆردومانەکانی تورکیاوە پەکیان کەوتووە.
