کۆمسیۆنی باڵای سەربەخۆی هەڵبژاردنەکانی عێراق بەیاننامەیەکی بڵاوکردەوە و دەڵێت”ئێمەش نازانین کە دەنگ بە کێ دەدرێت”.
کۆمسیۆنی باڵای هەڵبژاردنەکانی عێراق بەیاننامەیەکی بڵاوکردەوە و تێیدا هاتووە، کۆمسیۆن تەواوی ئامادەکارییەکانی کردووە و ئامادەیە بۆ ئەنجامدانی دەنگدانی گشتی کە سبەینی بەڕێوەدەچێت.
ئاماژە بەوەشدراوە، وەک کۆمسیۆن هەموو ئەو پڕوپاگەندانە ڕەتدەکەینەوە کە پەیوەندیدارن بە نهێنی دەنگدانی گشت دەنگدەران لە هەردوو دەنگدانی تایبەت و گشتی.
کۆمسیۆن ڕوونیشیکردۆتەوە، بژاردەی دەنگدەر لەمافی دەنگدان نهێنییە و بەهیچ شێوەیەک هیچ کەسێک بە کۆمسیۆن و کارمەندەکانیشتیەوە ناتوانن لە ئامێرەکانی دەنگدان بزانن کە دەنگدەر دەنگی بە چ لایەنێک داوە.
کۆمسیۆن داوایەک لە لایەنەکان دەکات و دەڵێت، سەرجەم پاڵێوراوان و حزب و هاوپەیمانییەکان پابەندبن بە وەستاندنی بانگەشەی هەڵبژاردن، و داوا لە دەنگدەرانیش دەکەن هاوکاری کۆمسیۆن بن بە نەبردنی مۆبایل و کامێرا بۆسەر سندوقەکانی دەنگدان لە ڕۆژی دەنگدان.
