كۆمسیۆنی باڵای سەربەخۆی هەڵبژاردنەكانی عێراق، دواین راپۆرتی لەبارەی دەنگدانی تایبەت بڵاوكردەوە، لەبارەی كێشەی نەخوێندنەوەی پەنجەمۆریش ئاماژەی بەوەکردووە کە ژمارەی حاڵەتەكانی دەرنەچووی پەنجەمۆر گەیشتووەتە دوو هەزار و 901 حاڵەت.
ئەمڕۆ شەممە 19ـی تشرینی یەکەمی 2024، كۆمسیۆنی باڵای سەربەخۆی هەڵبژاردنەكانی عێراق راپۆرتێکی لە بارەی دەنگدانی تایبەت بڵاوکردەوە و تیایدا هاتووە: دوێنێ 215 هەزار و 960 دەنگدەر تۆمار كراون، 208 هەزار و 521 كەس كە دەكاتە 97% بەشدارییان لە پرۆسەكەدا كردووە.
باسی لەوەشکردووە، 165 بنكە و 749 وێستگەی دەنگدان بۆ دەنگدانی تایبەت هەبوو، لە كۆی گشتیی 203 هەزار و 773 دەنگدەریان پیاو و چوار هەزار و 748 دەنگدەریان ژن بوون.
لەبارەی ژمارەی دەنگدەرانی تایبەتی خوێندەوار و نەخوێندەوار، کۆمسیۆنی هەڵبژاردنەکان رایگەیاندووە: 189 هەزار و 857 دەنگدەری خوێندەوار و 18 هەزار و 664 دەنگدەری نەخوێندەوار هەبوون.
لە راپۆرتەكەدا ئەوەش خراوەتەڕوو، کە پرۆسەی دەنگدانی تایبەت بە چاودێریی هەزار و 926 چاودێر لە بنكەكانی دەنگدان بەڕێوەچووە، هەروەها سێ هەزار و 750 نوێنەری قەوارە سیاسییەكان لە بنكەكانی دەنگدان ئامادە بوون.
لەبارەی كێشەی نەخوێندنەوەی پەنجەمۆر کۆمسیۆن ئەوەی ئاشکرا کردووە: 205 هەزار و 620 دەنگدەر پەنجەمۆریان تۆمار كراوە، ژمارەی حاڵەتەكانی دەرنەچووی پەنجەمۆریش گەیشتووەتە دوو هەزار و 901 حاڵەت.
