ئێوارەی ئەمڕۆ لە ناوچەی پیشەسازی سلێمانی ئاگرێکی بەهێز لە دوو کۆگا کەوتەوە.
بەهۆی ئاگرەکەوە تا ئێستا دوو کۆگا گڕیان گرتووە و مەترسی بۆ سەر چەند پێسانگایەکی ئۆتۆمبێلیش لە نزیک کۆگاکان دروستکردووە.
پەیامنێرمان لە شوێنی ڕووداوەکە پێی ڕاگەیاندن، نزیک کاتژمیر 5ـی پاشنیوەڕۆ بەهۆی ئیزوگامکردنەوە کارگەیەکی ئاو لەسەرەتادا سووتاوە و دواتر تەشەنەی سەندووە.
ئاماژەی بەوەشکرد، سەرەتای ئاگرەکە تەنها دوکەڵێکی کەم بووە بەڵام بەخێرایی تەشەنەی سەند بۆ کارگەیەکی دروستکردنی قەنەفە و دواتر بڵاوبۆتەوە بۆ پشتی کارگەکان.
بەپێی زانیارییەکانی پەیامنێرمان، زیانی گیانی نەبووە، بەڵام زیانە مادییەکان زۆرن و بەهۆیەوە دوکەڵ ئاسمانی ناوچەکە و شاری سلێمانی گرتۆتەوە، هاوکات چەندین تیمی بەرگری شارستانی لە شوێنی ڕووداوەکەن و سەرقاڵی کۆنتڕۆڵکردنی ئاگرەکەن.
