شارەزایەكی كەشناسی ڕایدەگەیەنێت، کەشی وشک و سەقامگیر تا هەفتەیەكی تر یان زیاتریش درێژەی دەبێ لەسەر ناوچەکانمان.
شاڵاو هیدایەت، شارەزای كەشناسی بۆ (خەڵك) ڕایگەیاند، وەک سەرەتای مانگی 10 ئاماژەمان پێدا، کە کەشی وشک و سەقامگیر تامەودایەکی نادیار درێژەی دەبێت لەسەر ناوچەکانمان ئەویش بەهۆی گۆڕانکاری لەسیستەمی کەش و هەوای بەشێکی ناوچەکانی ئەوروپا و گەڕانەوەی کەشێکی تەڕی باراناوی بۆیان.
ڕاشیگەیاند، بەو هۆیەوە ماوەی هەفتەیەکە ناوچەکانمان کەوتۆتە ژێر کاریگەری سیستەمێکی پەستان بەرزی خۆرهەڵاتی ئەوروپا، کە کەشێکی وشک و سەقامگیری ڕەخساندووە لەسەر ناوچەکانمان و دووبارە لەمڕۆ و ڕۆژانی داهاتودا ناوچەکە دەکەوێتە ژێر کاریگەری سیستەمێکی تری بەرزە پەستانی دەریای ناوەڕاست و بەو هۆیەوە بەرزە پەستان وەک دیوارێک دەبێتە بەربەست و ناهێڵێ حاڵەتەکانی دابارین ڕوو بکەنە ناوچەکە.
وتیشی، “لەمڕۆ و ڕۆژانی داهاتودا خێرایی با بەزۆری لەسەرخۆ دەبێت و پلەکانی گەرماش بەگشتی نزم بوونەوە بەخۆوە نابینن ئەویش بەهۆی جێگیربوونی سیستەمی بەرزە پەستان لەسەر ناوچەکانمان”.
