سوپای ئیسرائیل ڕایگەیاند، لە ماوەی 24 کاتژمێری ڕابردوودا هێرشی کردووەتە سەر زیاتر لە 230 ئامانج لە لوبنان و غەززە.
ئەمرۆ چوارشەممە، ئەفیخای ئەدرعی، وتەبێژی سوپای ئیسرائیل ڕایگەیاند، سوپا سەرکەوتوو بووە لە نەهێشتنی ژمارەیەک ئەندامی حزبوڵا لە باشووری لوبنان، ئەمە جگە لە بۆردومانکردنی شوێنی هەڵدانی مووشەکەکانیان و ئامرازە جۆراوجۆرەکانی شەڕ.
ئەدرعی ئاماژەی بەوەشکرد، سوپا لە ئۆپەراسیۆنەکانی بۆ سەر کەرتی غەززە بەردەوامە و چەند ئامانجێکیان بۆردومان کردووە.
ڕاشیگەیاند هێزەکانیان نزیکەی 185 ئامانجی حزبوڵایان لە لوبنان و 45 ئامانجی حەماس لە کەرتی غەززە بپردومان کردووە.
جەختیشی لەوە کردەوە کە هێزەکانی سوپای ئیسڕائیل”لە هەموو بەرەکاندا لە ڕووی هێرشبردن و بەرگرییەوە ئامادەن”.
لە لایەکی دیکەشەوە حزبوڵای لوبنانی ڕایگەیاند، لە نزیک گوندی لابونەی سنووری لوبنان و ئیسرائیل، هێزەکانی سوپای ئیسرائیلیان کردووەتە ئامانج.
