سەرۆکی یەکێتی لەمیانی بەشداریکردن لەبانگەشەی هەڵبژاردنی حزبەکەی ڕایگەیاند” یەکێتی بە بەهێزی گەڕاوەتەوە و بەرنامەی مام جەلال تەواودەکەین”.
ئەمڕۆ چوارشەممە، لە پارێزگای هەڵەبجە، بافڵ تاڵەبانی سەرۆکی یەکێتی لەمیانی بەشداریکردن لە بانگەشەی هەڵبژاردنی حزبەکەی وتارێکی پێشکەش کرد و وتی، لە کوردستان باشترین خاک و غاز و نەوت و سامانمان هەیە بەڵام کوردستانمان بەم جۆرەیە، هیچ پێشکەوتنێکی ئەوتۆی بەخۆیەوە نەبینیوە.
ئاماژەی بەوەشدا، 17 ساڵ سەرۆکی وەزیران لای حزبێک بوو، بەڵام کوردستان بۆ پێشەوە نەڕۆشت و پێشنەکەوت، تەنها ئەو کاتانە نەبێت کە یەکێتی دەسەڵاتی زۆربوو و بەهێزبوو.
لەبارەی مووچە و بودجە، بافڵ تاڵەبانی ڕایگەیاند، من و قوباد تاڵەبانی چوین بۆ بەغدا بودجەمان تێپەڕاند و هیچ گرفتێک نەبوو، بەڵام مووچە نادرێت چونکە دەیانەوێت لە بانکەکانی خۆیانەوە مووچە بدرێت.
راشیگەیاند، یەکێتی بە بەهێزی گەڕاوەتەوە و بەرنامەی مام جەلال تەواودەکەین و ئەو ستەمەی لە خەڵك دەکرێت کۆتایی پێ دەهێنین.
هەر لە وتارەکەیدا بافل تاڵەبانی پەیامێکی بۆ مامۆستایانی ئایینی نارد و وتی”ئێمە وەک حزبەکانی ترنین دوورتان بخەینەوە لە مزگەوتەکان و وتارەکانتان بۆ دیاری بکەین، بەڵکو ئێمە پشتیوانتان دەبین و ئێوە سەرکردەمان بن، هەموو ئەو دەزگایانەی دژی دین بوون لەناو یەکیتی هەمویمان لە ڕیشەوە هەڵکێشا”.
