حزبوڵای لوبنان، ئەمڕۆ چوارشەممە ڕایگەیاند، بارەگای فەرماندەیی مۆسادیان لە ناو تەلئەبیب بە مووشەکێکی بالیستیکی کردۆتە ئامانج.
لە بەیاننامەیەکدا حزبوڵی لوبنان ڕایگەیاندووە، “کاتژمێر ٦:٣٠ خولەکی بەرەبەیانی مووشەکێکی بالیستیکی قادر ١ی بۆ بەرگریکردن لە لوبنان و بەرەو بارەگای مۆساد لە جەرگەی تەلئەبیب هەڵداوە”.
ئاماژەی بەوەشکرد، “بارەگاکە بەرپرسیارە لە تیرۆرکردنی سەرکردەکان و بۆردومانکردن و تەقاندنەوەی پەیجەر و ئامێرەکانی ڕادیۆ”.
ماوەی 3 ڕۆژە حزبوڵا و سوپای ئیسرائیل ئاڵوگۆڕی هێرشی ئاسمانی و مووشەکی دەکەن، ئەمەش هەڕەشەی سەرهەڵدانی شەڕێکی هەمەلایەنە لە ناوچەکە دەکات.
تا ئامادەکردنی ئەم هەواڵە، بۆردومانی ئیسرائیل بۆ باشووری لوبنان و بەیروت بووە هۆی سەدان کوژراو و هەزاران بریندار، هاوکات حزبوڵا لەوەڵامدا دەستی کردووە بە بۆردومانکردنی ناوجە نیشتەجێبوونەکانی ئیسرائیل.
