وتەبێژی پۆلیسی پارێزگاری سلێمانی ڕایدەگەیەنێت، حاڵەتەکانی کوشتنی برا بەدەستی برا لەم چەند ساڵەی دواییدا زیادی کردووە و دەشڵێت: زۆرترین ھۆکارەکانیش کێشەی میرات و وەرەسەیە.
نەقیب سەرکەوت ئەحمەد، وتەبێژی پۆلیسی سلێمانی ڕایگەیاندووە، بەپێی ئەو حاڵەتانەی لەبەرێوەبەرایەتیەکەیان تۆمارکراوە کوشتنی برا بەدەستی برا لە قەزا و ناحیەکاندا زیاتر بەھۆی زەوی کشتوکاڵی و موڵکەوەیە، بەڵام لەشارەکاندا بەھۆی کێشەی وەرەسەی خانوو و دوکان و موڵکەوە بووە.
ڕاشیگەیاندووە، “چەندین کەیسمان لایە برا، برای خۆی کوشتووە، جا چی برا گەورەکە بێت یان برا بچووکەکە”.
ئاماژەی بەوەشكردووە، “ئێمە وەک لایەنی ئەمنی و پەیوەندیدار ناتوانین ھیچ کارێکی پێشوەختە بۆ ئەم حاڵەتانە بکەین، چونکە کێشەکان شاراوەن لەنێوان خێزاندا ڕوودەدەن، کاتێک ئێمە بەڕووداوەکە دەزانین، حاڵەتی کوشتنەکە ڕوویداوە، ناتوانین ھیچ بکەین لەو حاڵەتەدا”.
