جێگری سەرۆکوەزیرانی هەرێم هەنگاوەکانی بۆ چارەسەرکردنی گرفتەکانی مووچەی هەرێم دەخاتەروو و دەڵێت”پێویستمان بە سەرژمێرییەکی پاک و بێگەردی دوور لە سیاسی هەیە”.
لەمیانی بەشداریکردنی لە دووەمین پێشانگای ساڵانەی نێکست ستێپ لە سلێمانی قوباد تاڵەبانی لە کۆنگرەیەکی ڕۆژنامەوانیدا ڕایگەیاند، ساڵێک زیاترە هەنگاوەکان بۆ چارەسەرکردنی گرفتی مووچە لەنێوان عێراق و هەرێم بەرەو ئاستێکی باش نراون، و گرفتەکانمان وردە وردە بچوک کردۆتەوە و هیوامان ئەوەیە بەیەکجاری بنبڕبکرێت.
ڕاشیگەیاند، لە کۆبوونەوەی ئەم دواییەی ئەنجومنەی ئابوری حکومەتی فیدڕاك و ئەنجومەنی ئابوری حکومەتی هەرێم چەند کێشەیەک چارەسەر کراوە و زۆر بابەتی تر ڕێککەوتنی لەسەر کراوە، و ئەمڕۆش بەرهەمی ئەو دانوستانە ناردنی ئەو جیاوازییە مووچەیەبوو کەبۆ مانگەکانی حەوت و هەشت بڕدرابوو.
وتیشی، هێشتا بڕێک ماوە بۆئەوەی بتوانین پارەت تەواوی مووچەی مانگی هەشت تەواو بکەین، بەڵام هەنگاوەکان باشن و دڵخۆشکەرن.
قوباد تاڵەبانی ڕاشیگەیاند، شاندەکەی هەرێم بۆ یەکخستنەوەی خانەنشینی و هەندێک بابەتی تر دەچنە بەغدا و ئومێد دەکەین ڕێککەوتنی تەواو بکرێت.
دەربارەی سەرژمێری قوباد تاڵەبانی ڕایگەیاند، پێویستمان بە سەرژمێری هەیە، بەڵام دەبێت سەرژمێرییەکی پاک و بێگەرد بێت، دوور لە ناکۆکی سیاسی و لایەنی بێت، و ئومید دەکەین وەک سەرژمێرییەکانی تر نەبێت کە بەسیاسی کراون و مافی کورد و هەندێک نەتەوە پێشێل کراوە، و سەرژمێری ڕێگایەک نەبێت بۆ چەسپاندنی ئەو غەدرەی لە کورد کراوە.
