فراکسیۆنی یەکێتی لە پەرلەمانی عێراق بەتوندی ئیدانەی هێرشە درۆنییەکەی ناحیەی زەلان سەر بە قەزای چوارتا دەکات.
لە بەیاننامەیەکدا فراکسیۆنی یەکێتی لە پەرلەمانی عێراق دژی بۆردومانەکانی تورکیا هاتە دەنگ و دەڵێت” بێدەنگی و بێ هەڵوێستی عێراق و هەرێم جۆرێکە لە شەرعیدان بەو کارە”.
دەقی بەیاننامەکەی فراکسیۆنی یەکێتی :
بەتوندی پەلاماری بێبەزەییانەی فرۆکە بێفرۆکەوانەکانی تورکیا بۆ سەر هاوڵاتیانی هەرێمی کوردستان شەرمەزار دەکەین، بەتایبەتی لەماوەی کەمتر (٧٢) سەعاتی رابوردودا لەدوو پەلاماری جیادا لە سنوری پارێزگای سلێمانی و دهۆک (٧)هاوڵاتیان شەهید کردوەو کە ئەندامی دوو خێزانن یەکێکیان منداڵە و ژمارەیەک هاوڵاتی تریشیان بریندارکردوە.
پرسەو سەرەخۆشی ئاراستەی کەسوکاری شەهیدەکان دەکەین لەخوای گەورەش داوای شیفا بۆ بریندارەکان دەکەین.
بەردەوامی پەلامارەکان و بێدەنگی و بێ هەڵوێستی حکومەتی ئیتحادی و حکومەتی هەرێم لەئاست شەهید و بریندارکردن و پێشێلکردنی سیادەی عێراق جۆرێکە لە شەرعیەتدان بەپەلامارەکان.
جارێکی تر داوا لە حکومەتی عێراق و حکومەتی هەرێمی کوردستان دەکەین ئەم بێدەنگیە بشکێنن و هەڵوێستی جددی بنوێنن.
