ئەندامێكی مەكتەبی سیاسی یەكێتیی نیشتمانیی كوردستان ڕایدەگەیەنێت، ئەوەی کراوە یەکێتیی کردویەتی و ئەوی دەبێ بکرێ هەر بە یەکێتیی دەکرێت و دەشڵێت: حکومەتەکە لەم سەرۆکی حکومەتە و تیمە زەردەکەی وەردەگرینەوە.
ستران عەبدوڵا، ئەندامی مەکتەبی سیاسی یەکێتیی بۆ میدیاكانی حزبەكەی ڕایگەیاندووە، بەرنامەی یەکێتیی ڕوون و ئاشکرایە، یەکێتی جاڕی داوە کە حوکمڕانی داهاتووی کوردستان خۆمان نەخشی سەرەکی تیا دەگێرین، خۆمان سیاسەتەکەی دادەنێین، چونکە ئەمە هەر بە یەکێتیی دەکرێت، سەرۆک مام جەلال جوانی گوتوە “ئەوەی کراوە یەکێتیی کردویەتی و ئەوی دەبێ بکرێ هەر بە یەکێتیی دەکرێت”.
دەشڵێت: “جا پارتی ئەمە دەزانێت، سەرۆکی کابینەی شکستیش دەیزانێ، بۆیە جەنگی مەغلوبەیان دژی یەکێتیی بەرپا کردووە لە تەخوینەوە بۆ جنێودان و بۆ هەوڵی پەکخستنی هەلبژاردنیش، دەستی یەکتری باش خوێندراوەتەوە”.
ستران عەبدوڵا ئاماژە بەوەش دەکات، “سەرۆکی یەکێتیی بافڵ جەلال تاڵەبانی لەبەر کورد و لەبەر خەڵکی کوردستانیش سەرکردایەتی بەرنامەی ڕاستکردنەوەی ڕێڕەوەکە دەکات، کە حکومەتەکە لەم سەرۆکی حکومەتە و تیمە زەردەکەی وەردەگرێتەوە”.
