بەپێی ڕاپۆرتە كەشناسییەكان، ئەم شەپۆلی بەفر و بارانەی هەرێم و عێراقی گرتۆتەوە تا سبەی ئێوارە بەردەوام دەبێت و لە ڕۆژی شەممەوە شەپۆلێكی دیكە هەرێم دەگرێتەوە و بارستە هەوایەكی ساردی لەگەڵ دەبێت.
ئاراس جەبار، شارەزای كەشناسی بۆ (خەڵك) ڕایگەیاند، سبەی پێنج شەممە ٥-١-٢٠٢٣ لەئەنجامی بەردەوامی كاریگەری شەپۆلی دەریای سوور بارانی مامناوەند ناوبەناو تا كاتەكانی ئێوارە لەناوچەكانی سنوری ئیدارەی گەرمیان و پارێزگای سلێمانی و ھەڵەبجە و ئیدارەی ڕاپەڕین بەردەوامی ئەبێت و لەناوچەكانی دیكەدا كەش سەقامگیرئەبێت.
ڕاشیگەیاند، پلەكانی گەرما ١ تا ٢ پلە نزمتر دەبنەوە و خێرای با لەسەرخۆ دەبێت، بەڵام ھۆشداری لە دروستبوونی تەم و مژی چر ئەدەین بەتایبەت لە سبەی ئێوارەوە بۆ بەرەبەیانی ڕۆژی ھەینی لەھەریەكە ناوچەكانی گەرمیان و ھەڵەبجە و سلێمانی .
ئاماژەی بەوەشكرد، لە ڕۆژی شەممەوە ٧-١-٢٠٢٣ تا ئێوارەی ڕۆژی یەك شەممە ئەگەر ھەیە شەپۆلێكی نوێی لاواز بۆ مامناوەندی بارانبارین ھەرێمی كوردستان بگرێتەوە، كە بارستە ھەوایەكی ساردی لەگەڵدایە و كاریگەری ئەم نزمە پاڵەپەستۆیە لە دەریای رەش و توركیاوە بۆ سەر ناوچەكانمان درێژئەبێتەوە.
ڕوونیشی كردەوە، ئەگەر ھەیە ناوچەكانی سنوری پارێزگای دھۆك و ھەولێریش بگرێتەوە و بەھۆی نزمبوونەوەی زیاتری پلەكانی گەرماش لەناوچە شاخاویەكاندا بەفر بارین زیاتر دائەبەزێت.
