پێش نیوەڕۆی ئەمڕۆ بەهۆی بۆردومانی فڕۆکەیەکی بێفڕۆکەوانی توركیاوە ئۆتۆمبێلێک لەنزیک گوندی تەپەڕەشی سەر بەسەیدسادق كرایە ئامانج و بەهۆیەوە سێ کەس بوونە قوربانی.
بەپێی زانیارییەکان،ئەو ئۆتۆمبێلەی کە بۆردومان کراوە ڕۆژنامەنووسانی کەناڵی (ستێرک تی ڤی) تێدابووە و یەکێک لەقوربانییەکان خەڵکی سلێمانیە و دووەمیان خەڵکی چەمچەماڵە و سێیەمیشیان ڕۆژنامەنووسێکی پارچەیەکی تری کوردستانە.
بە وتەی بەرپرسانی تەندروستی سەیدسادق، لە بۆردومانەکەدا دوو کەس، کە ناویان (گوڵستان تارا تەمەنى 40 ساڵ بووە و خەڵکى شارى باتمانە لە باکوورى کوردستان و هەواڵساز بووە و هێرۆ ئیبراهیم تەمەنى 27 ساڵ بووە و مۆنتێر بووە) لە بۆردوومانەکەدا گیانیان لەدەستدا و کەسێکی دیکە بەناوی (ڕێبین) کە وەرگێڕی یاسایی بووە، دەست و قاچی شکاوە.
ئەمە لەكاتێكدایە، كە دژەتیرۆری پارتی بڵاویكردۆتەوە، ئەمڕۆ هەینی 23ی ئابی 2024، کاتژمێر 11:00ی پێشنیوەڕۆ، فڕۆکەی بێفڕۆکەوانی سوپای تورکیا ئۆتۆمبێلێکی چەکدارانی (پەکەکە)ی لە نزیک گوندی تەپەڕەشی قەزای سەیدسادق لە پارێزگای سلێمانی کردە ئامانج، بەهۆیەوە بەپرسێکی پەکەکە و شۆفێرەکەی و چەکدارێکی یاوەری کوژران.
