میدیای فەرمی عێراق هەواڵی هەڵبژاردنی پارێزگار و سەرۆکی ئەنجومەنی پارێزگەی کەرکووکی بڵاوکردەوە.
ئاژانسی هەواڵی عێراقییە کە میدیای فەرمی عێراقە لە زاری عیماد عامری، وتەبێژی ئەنجومەنی پارێزگەی کەرکووکەوە بڵاویکردەوە، لە کۆبوونەوەی ئەنجومەنەکەدا ڕێبوار تەهای وەک پارێزگار و محەمەد حافزی وەک سەرۆکی ئەنجومەنی پارێزگەی کەرکووک هەڵبژارد.
کۆبوونەوەکە دوێنێ شەو لە هۆتێل ڕەشیدی بەغدا بە بەشداری پێنج ئەندامەکەی یەکێتی، سێ ئەندامی پێکهاتەی عەرەب و ئەندامێکی بابلییون و بە بێ ئامادەبوونی پارتی و تورکمانەکان بەڕێوەچوو.
هەر لەو کۆبوونەوەیەدا محەمەد تەمیم وەک جێگری یەکەمی پارێزگاری کەرکووک هەڵبژێردرا و پۆستی جێگری دووەمی پارێزگار و جێگری سەرۆکی ئەنجومەنی پارێزگا بە بەتاڵی بۆ پێکهاتەی تورکمان بەجێهێڵدرا.
بەوەش دوای حەوت ساڵ، جارێکی دیکە پۆستی پارێزگاری کەرکووک بۆ کورد گەڕایەوە و بە پێی ڕێککەوتنی نێوان پێکهاتەکان، دوو ساڵ پۆستەکە لای کورد و دوو ساڵەکەی دیکە لای عەرەب دەبێت.
