وەزیری دارایی و ئابوری حکومەتی هەرێم لەگەڵ بەڕێوەبەری گشتی گومرگ، دەستەی وەبەرهێنان و نوێنەری وەزارەتی سامانە سروشتیەکان کۆبوەوە و رایگەیاند، دامەزراندنی سندوقی شێرپەنجە یەکێکە لە پڕۆژە ستراتیجیەکان و لەرێگەی یاسایەکی بەرکارەوە، بڕیاریانداوە پاڵپشتی دارایی بۆ دابین بکەن.
وەزارەتی دارایی و ئابوری هەرێم بڵاویکردووەتەوە، ئاوات جەناب نوری وەزیری دارایی و ئابوری لە دیوانی وەزارەتی دارایی و ئابوری بە ئامادەبونی عەلی عوسمان بریکاری وەزارەتی بازرگانی و پیشەسازی، سەرپەرشتی كۆبونەوەیەکی کرد بە ئامادەبونی یاسین عبدالواحید بەڕێوەبەری گشتی دیوانی وەزارەتی دارایی، سامال عبدالرحمان بەڕێوەبەری گشتی گومرگ، هەریەکە لە نوێنەری دەستەی وەبەرهێنان و وەزارەتی سامانە سروشتیەکان و سەرۆکی سندوقی شێرپەنجە.
بە گوێرەی راگەیەندراوەکە لە کۆبونەوەکەدا پرسی دابینکردنی پاڵپشتی دارایی بۆ سندوقی شێرپەنجە تاوتوێکرا کە خۆی دەگرێت لە بەشێک لەو باج و رسوماتانەی لە لایەن بەشێک لە وەزارەتەکانەوە وەردەگیرێت بە میکانیزمێکی تایبەت ڕێژەیەکی بۆ سندوقەکە دابین دەکرێت.
لە کۆبوونەوەکەدا، ئاوات جەناب نورى وتى:” دامەزراندنی سندوقی شێرپەنجە یەکێکە لە پڕۆژە ستراتیجیەکانی وەزارەتی تەندروستی کە دەبێت لە پێناو خزمەتکردنی هاونیشتیمانیانی توشبوو بە نەخۆشیەکە پاڵپشتی دارایی بۆ دابین بکەین”.
