پەرلەمانی عێراق لەدانیشتنی ئەمڕۆیدا خوێندنەوەی یەکەمی بۆ هەمواری یاسای باری کەسێتی کرد و پەرلەمانتارێکیش دەڵێت” ڕێکەوتنی لەسەر کراوە”.
کەمێک لەمەوبەر پەرلەمانی عێراق كۆبووەوە و خوێندنەوەی یەكەمی بۆ هەردوو پڕۆژەی تایبەت بە هەمواری یاساكانی باری كەسێتی و لێبوردنی گشتی كرد.
فەرمانگەی راگەیاندنی پەرلەمان رایگەیاند، لەكۆبوونەوەكەدا خوێندنەوەی یەكەم بۆ هەمواری یاساكانی لێبوردنی گشتی و باری كەسێتی كراوە، كە پێشتر ناكۆكی و مشتومڕی زۆریان لێكەوتبووەوە.
ئاماژە بەوەشكراوە، هەر لەكۆبوونەوەكەدا تاوتوێكردنی پڕۆژە یاسای پەسەندكردنی رێككەوتنی گواستنەوەی ئاسمانی لەنێوان عێراق و سوریا دواخراوە.
هاوکات پەرلەمانتار یاسر حوسێنی لە لێدوانێکدا بۆ ماڵپەڕی ( ئەل مەعلومە) ئاماژەی بەوەداوە، دانیشتنەکانی داهاتوو تایبتە بە دەنگدان لەسەر یاسای باری کەسایەتی و زۆرێک لە پەرلەمانتاران هاوڕان لەگەڵ ئەم یاسایە.
ئەو پەرلەمانتارە دەشڵێت”هەموارکردنەوەی یاسای باری کەسێتی بەپێی شەریعەتی ئیسلامی مافێکی دەستوورییە و پێویست ناکات بابەتەکە بە سیاسی بکرێت”.
ئاماژەی بەوەشکرد، “لەدوای ئەوەی لایەنە پەیوەندیدارەکان وردەکاری تەواوی بڕگەکانی نێو هەمواری یاساکەیان ڕوونکردەوە، ناڕەزایەتییەکی کەم هەبووە بەرامبەر بە یاساکە”، ئاماژەی بەوەشکرد، “قبوڵکردن و ڕێککەوتنی سیاسی هەیە بۆ بەردەوامبوون لەسەر یاساکە، بەتایبەتی دوای ئەوەی چوارچێوەی هەماهەنگی پشتگیری تەواوی خۆی ڕاگەیاند”.
یاسای باری كەسێتیی كارپێكراوی ئێستای عێراق كە ساڵی 1959 دەرچووە دەڵێ: “مەرجە ئەو كچ و كوڕەی كە هاوسەرگیری دەكەن تەمەنیان گەیشتبێتە 18 ساڵ یاخود 15 ساڵ بن، بەڵام بە مۆڵەتی دادوەر و بەگوێرەی تەمەنی شەرعیی پێگەیشتن و توانای جەستەییان”.
ئەو پرۆژە یاسایەی ڕۆژی چوار شەممەی رابردوو لەلایەن پەرلەمانتارێكی شیعەوە بەناوی (رائد مالیكی) پێشكەش كراوە، پرۆژەی هەموارەكە رێگا بە پیاوانی ئاینیی شیعە و سوننە دەدات بڕیار لەسەر كاروباری هاوسەرگریی و جیابوونەوە و میرات بدەن.
ئەم پرۆژە هەموارە لەلایەن هەردوو لیژنەی یاسایی و لیژنەی ژنان و خێزان و منداڵانەوە بەرزكراوەتەوە بۆ سەرۆكایەتیی پەرلەمان بۆ ئەوەی خوێندنەوەی بۆ بكرێت و دواتر دەنگی لەسەر بدرێت، رۆژی چوار شەممە كاتێك ناڕەزایەتیی لەسەر دروستبوو، سەرۆكایەتیی پەرلەمان ناچار بوو لەسەر داوای ژمارەیەك لە پەرلەمانتاران خوێندنەوەی پرۆژەی هەموارەكە دوای بخات.
