بڕیارە ٢٠ی تشرینی یەکەمی ئەمساڵ، ھەڵبژاردنی خوولی شەشەمی پەرلەمانی کوردستان بەڕێوەبچێت و کۆمسیۆنی باڵای سەربەخۆی ھەڵبژاردنەکانی عێراقیش نموونەی سەرەتایی کاغەزی دەنگدانی پەسەند کردووە و چاوەڕێ دەکرێت لەمیانی تیروپشکدا، ژمارەی لیست و قەوارە سەربەخۆکان بخرێنە سەر کاغەزەکە.
جومانە غەلای، وتەبێژی کۆمسیۆنی باڵای سەربەخۆی ھەڵبژاردنەکانی عێراق ڕایگەیاند، کۆمسیۆن نموونە سەرەتاییەکانی پێنج کاغەزی دەنگدانیی پەسەند کردووە، چوار لەوانە تایبەتن بە چوار پارێزگاکەی ھەرێم و یەکێکی دیکەش تایبەتە بە پڕۆسەی دەنگدانی تایبەت، کاغەزەکان بەردەستن و لەکاتی تیروپشکدا، ژمارەی ھاوپەیمانی، لیست و بەربژێرە سەربەخۆکان دەخرێتە سەر کاغەزەکە”.
جومانە غەلای ئاشکراشی کرد کە لە کۆتایی مانگی ئابدا، پڕۆسەی تیروپشکەکە بەڕێوەدەچێت و بەمەش ڕێکارەکانی کاغەزی دەنگدان کۆتاییان پێ دێت و ئامادە دەبن.
بەپێی ئامارەکانی کۆمسیۆنی باڵای سەربەخۆی ھەڵبژاردنەکانی عێراق، لە ھەرێم دوو ملیۆن و ٨٨٨ ھەزار و ١٦٢ کەس مافی دەنگدانیان ھەیە، هەروەها ھەزار و ١٩٨ بەربژێر کێبڕکێ لەسەر بەدەستھێنانی ١٠٠ کورسی پەرلەمانیی دەکەن، هاوکات هەزار و ٤٢٧ بنکە و حەفت هەزار و ٤٧ وێستگەی دەنگدان ئامادەکراوە بۆ بەڕێوەچوونی پرۆسەکە.
ئەمە لە کاتێکدایە کە پێشتر کۆمسیۆنی باڵای سەربەخۆی ھەڵبژاردنەکانی عێراق رایگەیاند بۆ ھەڵبژاردنی خوولی شەشەمی پەرلەمانی کوردستان ١٣٩ قەوارە و بەربژێر بەشداری لە پڕۆسەکەدا دەکەن کە لە نێویاندا ٣٩ بەربژێری پێکھاتەکان ھەن.
