لە دوو ڕووداوی ئاگرکەوتنەوەدا دەیان دۆنم پووش و پاوانی سنووری قەزای دوکان سووتان و دوو کەسیش بە تۆمەتی هۆکاری ئاگرکەوتنەوە دەستگیرکران.
ئەمڕۆ سێشەممە، پۆلیسی دارستان و ژینگەی پارێزگەی سلێمانی ڕایگەیاند، تیمەکانی پۆلیسی دارستان و ئاگرکوژێنەوەی خەلەکان و هاووڵاتییانی سنوورەکە توانییان ئاگرێک بکوژێننەوە کە لە گوندی کانی وەتمان کەوتبووەوە.
ڕوونیشیکردەوە کە بە هۆی ئاگرەکەوە نزیکەی 10 دۆنم پووش و پاوان و چەند داربەڕوویەک سووتان و دواتریش دوو کەس بە تۆمەتی ئاگرکەوتنەوەکە دەستگیرکران.
پۆلیسی دارستانی سلێمانی ڕاشیگەیاند کە لە ڕووداوێکی دیکەی ئاگرکەوتنەوە کە سنووری گوندی کەڵکەسماقی سەر بە قەزای دوکان نزیکەی 50 دۆنم پووش و پاوان و داری سروشتی سووتان.
