دانیشتوانی شاری بەرشەلۆنەی کەتەلۆنیا لە ئیسپانیا خۆپیشاندانیان ئەنجامدا و داوای دەرچوونی گەشتییاران دەکەن لە شارەکەیان و دەڵێن”بەرشەلۆنە بۆ فرۆشتن نییە”.
میدیا جیهانییەکان بڵاویانکردەوە، هەزاران خۆپیشاندەر لە بەرشەلۆنە ڕژانە سەر شەقامەکانی بەرشەلۆنەو دروشمیان بەرزکردەوە و داوایان لە گەشتیاران دەکرد بگەڕێنەوە ناوچەکانی خۆیان.
هەر لە خۆپیشاندانەکەدا خۆپیشاندەران بە ڕشتنی ئاوو بەسەر گەشتییاراندا دروشمەکانیان دەوتەوە.
کە بەشداربووان ئاویان بەسەر گەشتیاراندا ڕشاندووە، و پۆلیسی ناوچەکەش دەڵێت، نزیکەی سێ هەزار کەس بەشدارییان لەو خۆپیشاندانەدا کردووە.
خۆپیشاندەران دەڵێن “لێشاوی گەشتیاران بووەتە هۆی بەرزبوونەوەی تێچووی ژیان و نرخی خانووبەرە و ڕەنگدانەوەی نایەکسانی کۆمەڵایەتی و گرفتی بەدەستخستنی یەکەی نیشتەجێبوون لە شارەکەیان.
بەگوێرەی ماڵپەڕی “ئایدیالیستا” تایبەتمەند لە بواری خانووبەرە، کرێی خانوو لە شارە گەشتیارییە بەناوبانگەکانی وەک بەرشەلۆنە و مەدرید لە مانگی حوزەیران بە بەراورد بە ساڵی پێشوو بە ڕێژەی لەسەدا 18٪ بەرزبووەتەوە.
یەکێک لە خۆپیشاندەران بە ئاژانسی هەواڵی ڕۆیتەرزی ڕاگەیاندووە: “ئێمە هاتووین بۆ ئێرە بۆ خۆپیشاندان دژی گەشتیاری بەکۆمەڵ لە بەرشەلۆنە، شارەکە زیاتر گرنگی بە گەشتیاران داوە، ئێمەش شارێکمان دەوێت بۆ هاووڵاتیان نەک تەنها بۆ گەشتیاران”.
یەکێکی دیکەش دەڵێت: چێشتخانە و هۆتێلەکان قازانجێکی زۆر دەکەن، بەڵام ئێمە دەبێت بجەنگین بۆ دابینکردنی پێداویستیەکانمان ئەمە گرفت و کێشەیەکە.
لە بەرامبەر زیادبوونی فشارەکاندا، جاومی کۆلبۆنی سەرۆکی شارەوانی بەرشەلۆنە “پلانێکی بۆ لابردنی سەرجەم (کرێی کورتخایەن) واتە بەکرێگرتنی یەکە نیشتەجێبوونەکان بۆ ماوەیەکی کاتی قۆناغ بە قۆناغ و تا ساڵی ٢٠٢٨ کەمکردنەوەی ژمارەی شوقە گەشتیارییەکانی شارەکەی” ڕاگەیاند.
