لەگەڵ هاتنی وەرزەكانی گەرما و سەرما، پێدانی كارەبای نیشتمانی بە هاووڵاتیان كەم دەبێتەوە و بەرپرسانی وەزارەتی كارەباش هۆكارەكەی بۆ “زۆربوونی خواست لەسەر بەكارهێنانی كارەبا” دەگێڕنەوە و لە ئێستاشدا وەك وتەبێژی وەزارەتەكە دەڵێت: 12 بۆ 13 كاتژمێر بە تێكڕا كارەبای نیشتمانی هەیە.
لە مانگی ئایاری ڕابردوودا بە تێكڕا لە شەو و ڕۆژێكدا 17 بۆ 18 كاتژمێر كارەبای نیشتمانی بە هاووڵاتییان دەدرا ئەوەش بەهۆی ئەوەی خواست لەسەر بەكارهێنانی كارەبای نیشتمانی كەم بوو بەهۆی فێنكی كەشوهەواوە، بەڵام لە ئێستادا بەهۆی بەرزبوونەوەی پلەكانی گەرما و بەكارهێنانی كارەبا بۆ فێنككردنەوە، پێدانی كارەبا كەمی كردووە.
ئومێد ئەحمەد، وتەبێژی وەزارەتی كارەبای حكومەتی هەرێمی كوردستان رایگەیاندووە، توانای بەرهەمهێنانی كارەبا لە هەرێمی كوردستان زۆر سنووردارە و تەنها دەتوانرێت 3500 بۆ 4 هەزار مێگاوات كارەبا بەرهەمبهێنرێت، ڕۆژانە 12 بۆ 13 كاتژمێر كارەبای نیشتمانی بۆ هاووڵاتییان دابین دەكەن.
ڕاشیگەیاند، خەرجی مانگانەی وەزارەتی كارەبا 100 ملیۆن دۆلارە و هیچ بڕە پارەیەكیان لەلایەن وەزارەتی داراییەوە بۆ خەرج ناكرێت، بۆیە بۆ كڕینی وزە و پێداویستییەكانی وەزارەتەكە تەنیا سوود لە 8٪ی ئەو داهاتە وەردەگرن، كە مانگانە لە هاوبەشانی كارەبای وەردەگرنەوە.
ئاشكراشی كردووە، بەهۆی قەیرانی دارایی و خراپی دۆخ و گوزەرانی هاووڵاتییانەوە، هاوبەشانی كارەبا قەرزێكی زۆریان لەسەر كەڵەكە بووە و مانگانە ناتوانن پارەی كارەبا بدەن بەوهۆیەوە داهاتی وەزارەتەكەیان كەمە.
