وەزارەتی بازرگانی عێراق پلانی بەبازاڕکردنی داهاتووی بۆ بەرهەمهێنانی ئاردی سفری دانەوێڵەی عێراقی بەڕێژەی 100% ڕاگەیاند، جەختیشدەكاتەوە، بەرهەمی ناوخۆیی بەتەواوی تەندروستە و بەبێ هیچ زیادکردنێک.
موحسین نامیس، بەڕێوەبەری گشتی کۆمپانیای دروستكراوی دانەوێڵە لە وەزارەتی بازرگانی، بە ئاژانسی فەرمی (العراقیە)ی ڕاگەیاند، عێراق یەکێکە لەو وڵاتانەی بڕێکی زۆر سەموون و نان بەکاردەهێنێت، کە دوو بابەتی بنەڕەتین لە هەموو ژەمێكدا و ساڵانە بڕێکی زۆر لەم مادەیە هاوردە دەکات.
ئاماژەی بەوەشکرد، ئاردی هاوردەکراو ڕێژەیەکی بەرزی گلوتین لەخۆدەگرێت و بەپێی پشکنینەکان مادەی کیمیایی لە هەندێک بەرهەمدا دەرکەوتووە، لەکاتێکدا بەرهەمهێنانی ئاردی سفری ناوخۆیی تایبەتمەندە بەوەی تەندروستترە و دوورە لە هیچ زیادکردنێک.
ئاشكر اشی كرد، “کۆمپانیاکە ئاسانکاری بۆ 6 ئاشی نوێی کردووە بە دابینکردنی گەنمی ناوخۆیی و هاوردە کە ٤یان لە بەغدان، یەکێکیان لە کەربەلا و دواهەمینیان لە شاری دهۆک”.
جەخت لەوە دەکاتەوە کە “مانگەکانی داهاتوو شایەتحاڵی هاتنەناوەوەی زیاتر لە 10 ئاش دەبن بە مەبەستی بەرهەمهێنانی ئاردی سفر و بەبازاڕکردنی لەناو فرۆشگاکانی بازاڕکردن.
وتیشی، “کۆمپانیاکە داواکاری زۆری پێگەیشتووە و زیاتر لە 56 ڕەزامەندی هەیە لە ئاشەكانی کارکردن لەسەر سیستەمی بازرگانی، کە یەک لە دوای یەک دەخرێنە ناو پلانەکەوە کاتێک ڕەزامەندی فەرمی وەردەگیرێت بە مەبەستی هاوردەکردنی گەنم و بەرهەمهێنانی ئاردی سفر و فرۆشتنی لە بازاڕەکان یان دابەشکردنی بەسەر فڕن و نانەواخانەکاندا”.
بەڕێوەبەری گشتی کۆمپانیای دروستكراوی دانەوێڵە دەشڵێت: پلانی بازاڕگەریی داهاتوومان هەیە بۆ بەرهەمهێنانی ئاردی سفری عێراقی بە ڕێژەی 100%، لە هەمان کاتدا گەیشتن بە خۆبژێوی، چونكە عێراق ساڵانە زیاتر لە یەک ملیۆن و 700 تۆن لە بەرهەمهێنانی ئاردی سفر بەکاردەهێنێت.
