هەردێ سەمیر – سینەماکار
زۆرجار باوکی کچ ھەبووە کەوتووە بە قینا و ووتویەتی کچەکەمت نادەمێ، کوڕەی عاشقیش دەزانێت باوکی خۆشەویستەکەی ھیچ بەھا و وجودێک بۆ خۆی دانانێت، بە ناچاری دەچێت یەخەی کەسێکی دەستڕۆیشتوو دەگرێت و دەیکات بە واستە بۆ ئەوەی دڵی باوکی دولبەرەکەی نەرمبکات.
فیلم و سینەماش وای لێھاتووە!
+ کاکە بۆ دەتەوێ فڵان کارەکتەری ناو تیکتۆکی تیابێ؟
-وەڵا چاوەکەم بینەر نایات، ئەمە بۆ مارکێتینە
کاکی دەرھێنەر و بەرھەمھێن، تۆ خۆت جود بۆ خۆت دانانێیت، دێیت کەسێک دەکەیت بە واستە، بۆیە ھانا بۆ کارەکتەرەکانی نێو سۆشیال میدیا دەبەیت، بە ناڕاستەوخۆ بە خەڵک دەڵێت: چاوەکەم تکایە ئەزانم نایەن بۆ لای من و بیرۆکەی من و ئایدیای من، بەڵام وەرن بۆلای فڵان کەس کە ئەکتەر نییە و بە پارەیەکی زۆر ھێناومانە.
چاوەکەم تۆ کەسێک دەکەیت بە واستە لەبەینی خۆت و بینەرەکەتدا، درکت بەوەکردووە کە خۆت و جودی خۆت بەدەستی خۆت لەناودەبەیت و لەدەستتداوە؟ درکت بەوە کردوە پیشەکەت بووە بە واستەکردن نەک دەرھێنەر و بەرھەمھێن؟
کوڕەی عاشق کەسێکی دەبرد بۆ قایلکردنی باوکی کچە، ئێمەش ھەمان شت دەکەین و سووریشین لەسەری کە ڕاستین.
لە ووڵاتانی دەرەوە مارکێتین دەکەن، بەڵام ئەوان بە ئەکتەرە زۆرباشەکانی خۆیانەوە دەیکەن، ھەندێک جار ھەبووە گۆرانیبێژ بووە بە ئەکتەر و کردوویانە، بەڵام پرسیارەکە ئەوەیە، ئایا ئەو فیلمە کوا لە دنیای سینەما و مێژوی سینمادا؟
