وەزارەتی کار و کاروباری کۆمەڵایەتی هەلی کاری لە قەزای ئاکرێ و بەردەڕەش ڕاگەیاند، کە دامەزراندنەکە بە شێوەی خاڵبەندی دیاری دەکرێت.
لە ڕاگەیەندراوێکدا وەزارەتی کار و کاروباری کۆمەڵایەتی دەرفەتی هەلی کاری ڕاگەیاند، بۆ کۆمەڵێک لە دەرچووانی دانەمەزراو لە بڕوانامەی بەكالۆریۆس بۆ پسپۆڕییەكانی: ژمێریاری، كارگێری، پەروەردەی تایبەت، كۆمەڵناسی، دەروونزانی؛ بڕوانامەی ئامادەیی بۆ ناونیشانی پاسەوان و كارگوزار؛ بڕوانامەی ناوەندی بۆ ناونیشانی چاودێر بە شێوەی گرێبەست ڕادەگەیەنێت.
ئاماژەی بەوەشکرد، بۆ بەڕێوەبەرایەتیی چاودێری و گەشەپێدانی كۆمەڵایەتیی ئاکرێ (ئاکرێ و بەردەڕەش)، سەنتەری ئۆتیزمی قەزای ئاکرێ.پاش دیاریکردنی لیژنەیەکی تایبەت بۆ ڕاگەیاندنی دابەشکردنی فۆرم لە ڕۆژی چوارشەممە ٢٠٢٤/٧/٣ ، بە مەبەستی دامەزراندن بە شێوەی خاڵبەندی دیاری بکرێت بەو مەرجانەی لای خوارەوە هاتووە.
– تەنها پێشكەشكارانی دانیشتووی قەزای ئاکرێ دەخرێنە پێشبركێی خاڵبەندیی هەڵبژاردنەوە.
– پێویستە خوازیار زانیاریی ڕاست و دروست پێشکەش بکات و لە ئەگەری تۆمارکردنی زانیاری هەڵە و نادروست، داواکاریی دامەزراندنی ڕەت دەکرێتەوە.
– نابێت خوازیار مووچەخۆر بێت لە هیچ دامودەزگایەکی حکومی و کەرتی تایبەت.
– ئارەزوومەند پێویستە بەڵگەنامەکانی (ئەسڵی و کۆپیکراو) لە ڕۆژی سەردانکردنی ئامادە بکات. (کارتی نیشتیمانی، کارتی زانیاری، پشتگیریی موختاری گەڕەک، بڕوانامە یان پشتگیریی دەرچوون).
دوای دابەشکردنی فۆرم؛ دەبێت لە ماوەی سێ ڕۆژدا فۆرمەکان بگەڕێنرێتەوە ھەمان شوێن.
ڕێكەوت و شوێنی دابەشكردنی فۆڕم:
ڕۆژی (چوارشەممە ٢٠٢٤/٧/٣)
باڵەخانەی بەڕێوەبەرایەتیی چاودێری و گەشەپێدانی كۆمەڵایەتیی ئاکرێ.
کات : ٩:٠٠ بەیانی
