ماوەی چەند ڕۆژێكە و بەتایبەت لەكاتی پشووی جەژنی قوربان و هاتنی ژمارەیەكی زۆری گەشتیار، نرخی بەنزین لە هەولێر 50 دینار و لە سلێمانی 25 دینار بۆ لیترێك بەرزبووەوە و پارێزگاری هەولێریش دەڵێت: هەوڵەكانی ئێمە ئەوەیە نرخی بەنزین وەكو هاوینی ڕابردوو هەم جێگیربێت و هەم كوالێتییەكەی بەرز بێت.
ئومێد خۆشناو، پارێزگاری هەولێر لە كۆنفڕانسێكی ڕۆژنامەوانیدا، كە پەیامێری (خەڵك) ئامادەی بوو، ڕایگەیاند، نرخی بەنزین كە 50 دینار گران بووە ئێمەش پێی نیگەرانین و هەوڵەكان بەردەوامن، بەڵام دەبێت قسە لەگەڵ وەزارەتی سامانە سروشتییەكان بكرێت.
ڕاشیگەیاند، هەوڵەكانی ئێمە ئەوەیە نرخی بەنزین وەكو هاوینی ڕابردوو هەم جێگیربێت و هەم كوالێتییەكەی بەرز بێت.
جەختیشی كردەوە، بەپێی ئەو بەدواداچوونەی هەمانە تا ئێستا كوالێتی بەنزین زۆر باشە، بەڵام بۆ دابەزاندنی نرخەكەی دەبێت قسە لەگەڵ وەزارەتی سامانە سروشتییەكان بكرێت.
