ئەمریکا یەکێک لە میلیشیا شیعەکان و سەرۆکەکەی دەخاتە لیستی تیرۆرەوە و باڵیۆزەکەشیان لە بەغدا دەڵێت، ئەو هەنگاوە جەخت لە پێداگری ویلایەتە یەکگرتووەکان لەسەر بەرەنگاربوونەوەی هەژموونی ئێران دەکاتەوە.
وەزارەتی دەرەوەی ئەمریكا ڕایگەیاند، بزووتنەوەی ئەنساروڵای ئەوفیا و سەرۆکەکەیان خستە لیستی تیرۆرەوە کە ناوەی حەیدەر مزهەر مەلیك سەعیدییە و بە حەیدەر غەراوی دەناسرێت.
ڕوونیشیکردەوە، نەساروڵا هاوپەیمانی ئێرانە و بەشێکە لە “مقاوەمەی ئیسلامی عێراقی”، کە ناوبەناو بەرژەوەندییەکانی ئەمریکا لە ناوچەکە دەکەنە ئامانج و ئەوەشی خستەتەڕوو کە میلیشیاکە بەرپرسیارێتی خۆی لە چەندین هێرشی سەر هێزەكانی هاوپەیمانان لە عێراق و سووریا ڕاگەیاندووە و تێوەگلاوە لە هێرشە درۆنییەكەی سەر بورجی 22ی ئوردن، كە تیایدا سێ سەربازی ئەمریكی كوژران.
لە ڕاگەیەندراوەکەدا هاتووە: کەتیبەکانی حزبوڵا، بزووتنەوەی نوجەبا و کەتیبەکانی سەیدولشوهەدا چەندین هێرشیان لە دژی هێزەکانی ئەمریکا ئەنجامداوە.
ئەمڕۆش ئەلینا ڕۆمانۆسکی، باڵیۆزی ئەمریکا لە بەغدا ڕایگەیاند، پۆلێنکردنی ئەنساروڵا و سەرۆکەکەی لە لیستی تیرۆردا، سەرلەنوێ پابەندبوونی ئەمریکا بە بەرەنگاربوونەوەی “هەژموونی قێزەونی ئێران و ئەو هەڕەشانە دووپات دەکاتەوە کە میلیشیاکانی سەر بە ئێران دروستی دەکەن”.
