بەڕێوەبەری ئاوی چەمچەماڵ ڕایدەگەیەنێت، كە تاوەكو ئێستا كێشەی ئاوی شارۆچكەكەیان چارەسەر نەكراوە و دەشڵێت: کێشەی بێئاویی چەمچەماڵ ساڵانێکە بەردەوامە.
زیاد جاندار، بەڕێوەبەری ئاوی چەمچەماڵ ڕایگەیاندووە، بەڕێوەبەرایەتیی ئاوی سلێمانی گوێیان لێ ناگرێت بۆ چارەسەرکردنی کێشەکانیان و هیچ هەوڵی دیکەش بۆ چارەسەرکردنی بێئاوییەکەیان نییە.
ڕاشیگەیاندووە، کێشەی بێئاویی چەمچەماڵ ساڵانێکە بەردەوامە و لە هاویناندا، کە هاووڵاتیان پێویستیان بە ئاوی زیاترە، كێشەكە گەورەتر دەبێت.
وتیشی، “بەشێکی ئاوی قەزاکە لە کانی شەیتانەوە لە لایەن کۆمپانیای ئەحمەد ئیسماعیلەوە دابین دەکرێت و ئەوە کەمبووەتەوە، ئاوی سلێمانیش لە ڕێگای بازیانەوە بۆ ئێمە دێت و ئەویش زۆر کەمبووەتەوە”.
