بەڕێوەبەرایەتی گشتی هاتووچۆی عێراق سزای ئەو شۆفێرانە دیاری دەكات، كە لە شەوی سەری ساڵدا سەرپێچی دەكەن و ڕایدەگەیەنێت، سزاكە غەرامەی دارایی نییە.
عەمید زیاد قەیسی، بەڕێوەبەری گشتی هاتووچۆی عێراق لە بەیاننامەیەكدا ئاماژەی بەوەداوە، لەسەر ڕاسپاردەی وەزیری ناوخۆ و وەك ڕێزێك بۆ ئاهەنگ گێڕانی شەوی سەری ساڵ، ئەمشەو غەرامەی سەرپێچیكارانی ڕەوتی هاتووچۆ ناكرێت، بەڵام ڕادەگیرێن و ئامۆژگاری و ڕێنماییان لەلایەن مەفرەزەكانی هاتووچۆوە پێ دەدرێت تاوەكو دووبارەی نەكەنەوە.
وتیشی، “داواكارین لە هاووڵاتیان ئاهەنگەكان بەجوانی بەڕێوەبەرن و هاوسەنگی ڕابگرن و سەرپێچی نەكەن و سیستمی هاتووچۆ جێبەجێ بكەن”.
جەختیشی كردۆتەوە، ئەمشەو غەرامەی شۆفێران ناكەین، بەڵكو ڕێنمایی و ئامۆژگارییان پێدەدەین.
