تونێلی گەلی زاویتە لە سنووری پارێزگای دهۆك دروست دەكرێت، بۆ ئەو مەبەستەش رێككارەكان دەستیان پێكردووە و ئاوەدانكردنەوەی پارێزگاكە ئاشكرای دەكات، درێژییەكەی 750 مەترە و نزیكەی 40 ملیار دیناری تێدەچێت.
ڕێدیر سلێمان، جێگری بەڕێوەبەری گشتیی ڕێگەوبان و ئاوەدانكردنەوەی دهۆك ڕایگەیاندووە، لە ئێستادا وەزارەتی ئاوەدانكردنەوە سەرقاڵی دەستنیشانكردنی كۆمپانیایەكە بۆ ئەوەی دیزاین و كارەكانی پڕۆژەكە پێبدرێت و دەست بە جێبەجێكردنی پڕۆژەكە بكرێت.
ڕاشیگەیاندووە، وەك یەكەم هەنگاو وەزارەتی ئاوەدانكردنەوە دەستیكردووە بە بانگهێشتكردنی سەرجەم كۆمپانیاكان بۆ پێشكەشكردنی تەندەر بەمەبەستی جێبەجێكردنی پڕۆژەكە.
ئاشكراشی كردووە، تونێلەكە دووسایدە و هەر سایدێك دووڵاین دەبێت، درێژییەكەشی 750 مەترە و گوژمەی جێبەجێ كردنیشی بە نزیكەی 40 ملیار دینار خەمڵێنراوە.
