نێچیرڤان بارزانی ڕایگەیاند، شۆڕشى گوڵان هه‌ستانه‌وه‌يه‌كى شكۆمه‌ندانه‌ى ميلله‌تێك بوو كه له‌پێناو ئازادى و سه‌رفرازيدا ئاماده‌ى گيانبه‌خشین و هه‌موو قوربانيدانێك بوو.
نێچیرڤان بارزانی، سەرۆکی هەرێمی کوردستان کە هاوکات جێگری سەرۆکی پارتی دیموکراتی کوردستان، پەیامێکی لە ساڵیادی شۆڕشی گوڵاندا بلاوکردەوە و دەڵێت: “له كاتێكدا ئه‌مڕۆ يادى شكۆدارى چل و هه‌شت ساڵه‌ى هه‌ڵگيرسانى شۆڕشى گوڵان ده‌كه‌ينه‌وه، سڵاو و دروود بۆ گيانى پاكى شه‌هيدان ده‌نێرين و به ڕێزه‌وه به‌بيريان ده‌هێنينه‌وه. سڵاو له ته‌واوى پێشمه‌رگه و كاديران و هه‌موو ئه‌و قاره‌مان و جوامێرانه‌ى به هه‌ر شێوه‌يه‌ك بێت، له ريزه‌كانى شۆڕشدا خه‌باتيان كرد”.
لە پەیامەکەدا هاتووە: “شۆڕشى گوڵان هه‌ستانه‌وه‌يه‌كى شكۆمه‌ندانه‌ى ميلله‌تێك بوو كه له‌پێناو ئازادى و سه‌رفرازيدا ئاماده‌ى گيانبه‌خشین و هه‌موو قوربانيدانێك بوو. له شۆڕشى گوڵاندا، گه‌لى كوردستان سه‌لماندى كه هه‌رگيز كۆڵ نادات و په‌يام و ئامانجى شۆڕشى مه‌زنى ئه‌يلوول به رابه‌رايه‌تيى بارزانيى نه‌مر تا سه‌ركه‌وتن به‌رده‌وامه”.
نێچیرڤان بارزانی ڕاشیگەیاند، كۆبوونه‌وه‌ى هێز و لايه‌نه‌كانى كوردستان به ده‌ورى ئامانجێكى باڵاوه، به‌رهه‌مى شۆڕشى گوڵان بوو كه له كۆتاييدا راپه‌ڕينى ئازارى 1991ى سه‌رخست و ئازادى و فيدراڵى و قه‌واره‌ى ده‌ستووريى هه‌رێمى كوردستانى به‌دوا هات. له‌م ياده‌دا جه‌خت له لێكگه‌يشتنى هاوبه‌ش ده‌كه‌ينه‌وه كه ئێستا و داهاتوويه‌كى باشتر بۆ گه‌لى كوردستان مسۆگه‌ر ده‌كات.
