لە بازاڕى قەیسەرى کۆنى کەرکووک ئاگرکەوتەوە و بەهۆیەوە زیاتر لە 100 دوکان سووتاون و تاوەکو ئێستاش هۆکارى کەوتنەوەى ئاگرەکە نادیارە.
بەرەبەیانى ئەمڕۆ یەکشەممە، ئاگر لە بازاڕى قەیسەرى کۆنى کەرکووک کەوتەوە و ژمارەیەک دوکانى بازاڕەکە بەتەواوى سووتان.
بەپێی زانیارییەکان، کەوتنەوەی ئاگرەکە كاتژمێر نزیكەی 3:30 خولەك بووبێت، بەهۆیەوە زیاتر لە 100 دوکان سووتاون و زیانێکى زۆریان بەركەوتووە، تاوەکو ئێستا هۆکارى کەوتنەوەى ئاگرەکە نادیارە، بەڵام گومان دەکرێت بەهۆی شۆرتی كارەباوە بووبێت و لە ماوەی دوو كاتژمێردا لەلایەن هێزەكانی بەرگری شارستانییەوە كۆنتڕۆڵكراوە.
دوو قەیسەرى بەناوى قیردارە و زیاتر لە 100 دوکان و کۆگا سوتاون، لێکۆڵینەوەش لە هۆکارى کەوتنەوەى ئاگرەکە دەستیپێکردووە.
بازاڕى قەیسەرى کۆنى کەرکووک، کۆنترین بازاڕى شارەکەیە و دەکەوێتە نزیک قەڵاى کەرکووکەوە و ساڵى 1883 دروستکراوە، ساڵى 1987 دووبارە نۆژەنکراوەتەوە.
