بە ئامادەبوونی لیژنەیەکی پەرلەمانی گرفتی جووتیارانی گوندی پەلکانە و دەوروبەری چارەسەر کرا و دەتوانن دروێنەی بەرهەمەکانیان بکەن.
سەباح حەبیب ڕایگەیاند، لیژنەیەکی پەرلەمانی بەسەرۆکایەتی شاخەوان عەبدوڵا جێگری سەرۆکی پەرلەمان ئەمڕۆ لەگەڵ جووتیاران گفتوگۆیان کرد و گەیشتنە ڕێککەوتن،
ئاماژەی بەوەشکرد، جووتیاران لە سبەینێوە دەتوانن دروێنەی خۆیان بکەن و تاڕادەیەکی باش لێکتێگەیشتن هەبووە،
وتیشی، ئەو عەرەبانەی چوونەتە سەر زەوی جووتیارانی کورد زەوییەکانیان لێ وەردەگیرێتەوە و لەماوەی ٦ مانگدا کێشەی ئەو زەویانە یەکلایی دەکرێتەوە،
هاوکات ئەوەشی خستەڕوو، چارەسەری ڕیشەیی بۆ ئەم گرفتە هەڵوەشاندنەوەی بڕیارەکانی ئەنجوومەنی سەرکردایەتی شۆرش ( مجلس قیادة الثورة)یە.
ماوەی زیاتر لە هەفتەیەکە جووتیارانی گوندی پەلکانە نەیانتوانیوە بچنە سەر زەوی و زارەکانیان و بەرهەمەکانیان بدورنەوە، هۆکارەکەش بۆ ئەوە دەگەڕێتەوە کە عەرەبە هاوردەکان ئەو زەوییانە بە هی خۆیان دەزانن و بەشێکیان داوادەکەن هاوبەشییان پیبکرێت لە بەرهەمەکاندا، هاوکات چەندین هامەر و سەربازی سوپای عێراق لەو گوندانە بوون بۆ ڕێگریکردن لە هەر ئاڵۆزییەک کە ڕووبدات.
