سەرۆکی فراکسیۆنی پارتی دیموکراتی کوردستان لە پەرلەمانی عێراق ڕایگەیاند، حکومەتی ھەرێمی کوردستان پابەندی ڕێککەوتنە لەگەڵ بەغدا و پێویستە بەغداش چیتر بیانوو بە ھەرێمی کوردستان نەگرێت. دەشڵێت: ڕێککەوتن و لێکتێگەیشتنیش ھەیە و پێویستە لە کاتی خۆیدا مووچەی فەرمانبەران بنێرن.
د. ڤیان سەبری، سەرۆکی فراکسیۆنی پارتی بۆ ماڵپەڕی فەرمی پارتی ڕایگەیاندووە، “ڕێککەوتن لە نێوان حکومەتی ھەرێمی کوردستان و حکومەتی عێراق ھەیە بۆ ئەوەی مانگانە مووچەی فەرمانبەران ڕەوانە بکەن و لێکتێگەیشتنیش لەنێوان ھەردوولا کراوە و حکومەتی ھەرێمی کوردستان ئەرکی خۆی جێبەجێ کردووە و پابەندی ڕێککەوتنەکە بووە، بەڵام حکومەتی عێراق پابەندی ڕێککەوتنەکە نییە و ھەر جارەو بیانوویەک دەدۆزنەوە، جارێک باسی وردبینی دەکەن و جارێک باسی نەناردنی لیستی ناوەکان دەکەن و ئێستاش وەزارەتی دارایی عێراق باسی نەبوونی سیولە دەکات، بۆیە ئەمە ھەمووی وا دەکات ناردنی مووچە دوابکەوێت و زەرەرمەندی یەکەمیش فەرمانبەرانی ھەرێمی کوردستانن.
جەختیشی كردۆتەوە، پێویستە حکومەتی عێراق پابەندی ڕێککەوتن لەگەڵ ھەرێمی کوردستان بێت و مووچە لە کاتی خۆیدا ڕەوانە بکات، چونکە ناکرێت ھەموو مانگێک بیانوویەک بە ھەرێمی کوردستان بگرن.
وتیشی: “ڕێککەوتنێکی سەرەتایی لەنێوان حکومەتی ھەرێمی کوردستان بۆ پڕۆژەی ھەژمای من لەگەڵ بانکی (تی بی ئای) ھەیە و ھەندێک رێکاری تەکنیکی ماون، بۆیە ھیوادارین ئەوەش کۆتایی بێت و یەکلا بکرێتەوە، بۆ ئەوەی بیانووی ئەوەش نەمێنێت، کە داوا دەکرێت پێویستە مووچەی فەرمانبەرانی ھەرێمی کوردستان تەوتین بکرێت، بۆیە حکومەتی ھەرێمی کوردستان لە ھەوڵی بەردەوامدایە ئەو پرسەش یەکلا بکاتەوە و ھیچ بیانوویەک بۆ بەغدا نەمێنێت و کێشەی مووچە بە تەواوی چارەسەر بکرێت”.
سەرۆکی فراکسیۆنی پارتی دەشڵێت: “داواکارین حکومەتی عێراق ناردنی مووچەی فەرمانبەران بکاتە ئەولەویەتی کارەکانی و مانگانە لە کاتی خۆیدا مووچەی فەرمانبەرانی ھەرێمی کوردستان ڕەوانە بکات، چونکە ناکرێت ھەر مانگێک بیانوویەک بە ھەرێمی کوردستان بگرن و ناردنی مووچەی فەرمانبەران دوابکەوێت، لەبەر ئەوەی ئێستا مانگی پێنجە و هێشتا مووچەی مانگی چوار ڕەوانە نەکراوە”.
