وەزارەتی شارەوانی و گەشتوگوزار ڕایگەیاند، زیاتر لە ملیارێک و 327 ملیۆن دینار بۆ چەند پرۆژەیەکی خزمەتگوزاری سلێمانی خەرج دەکات.
ئەمڕۆ پێنجشەممە، وەزارەتی شارەوانی و گەشتوگوزار ڕایگەیاند، بەپێی چەند فەرمانێكی وەزاری، ڕەزامەندی لەسەر خەرجكردنی گوژمەی ملیارێک و 327 ملیۆن و 120 هەزار دینار درا.
ڕوونیشیکردەوە ئەو گوژمەیە بۆ سەرۆكایەتیی شارەوانیی سلێمانی خەرج دەکرێت بەمەبەستی گەیاندنی خزمەتگوزاری بۆ شوێنە جیاوازەكانی شارەكە.
وەزارەتی شارەوانی ڕاشیگەیاند، ئەو گوژمەیە لەسەر داهاتی سەرۆكایەتیی شارەوانیی سلێمانییە و بەپێی ڕێنماییەكانی دارایی تایبەت بە داهات خەرج دەكرێت بەمەبەستی دابینكردنی سووتەمەنی بۆ كارگەی قیری شارەوانی و گەیاندنی خزمەتگوزاری بە شەقام و كۆڵانەكان و بەڕێوەبردنی هەڵمەتەكانی نۆژەنكردنەوەی شەقامەكانی شاری سلێمانی.
