باران بارینی بەخوڕ و تەرزە لە سلێمانی دەستی پێكردەوە و شارەزایانی كەشناسی هۆشداری ڕوودانی هەورەبروسكە دەدەن و ڕایدەگەیەنن، شەپۆلەكە تاوەكو درەنگانی ئەمشەو بەردەوام دەبێت.
ئاراس جەبار، شارەزای بواری کەشناسی بۆ (خەڵك) ڕایگەیاند، لە خۆرھەڵاتی شاری سلێمانی بارستە ھەورێکی بەھێزی ھەورەبروسکە و تاوە تەرزە و بارانی بەخوڕ دەرکەوتووە و لە ماوەی نیو کاتژمێر بۆ کاتژمێرێکی دیکە تەواوی ناوچەکانی شاری سلێمانی دەگرێتەوە .
لای خۆشیەوە، محەمەد كەمال، شارەزای بواری كەشناسی بۆ (خەڵك) وتی، “بە تێپەڕبوونی كات كاریگەری شەپۆلی باران بارین لە سلێمانی زیاتر دەردەكەوێت و ڕووبەرێكی زیاتر دەگرێتەوە وە بارستە هەوری ماماتۆس و سۆپەرسێڵ ئەگەری گەشەكردنیان هەیە لەگەڵ ئەگەری تاوە تەرزە و بروسەكی بەهێز، كە لە زەوی دەدات”.
ڕاشیگەیاند، ئەگەری دروستبوونی لافاو و بەرزبونەوەی ئاستی ئاو بۆ هەندێك ناوچە هەیە.
وتیشی، “ئەم بارودۆخە بەردەوام دەبێت و تانانەت بۆ هەندێك ناوچەی سنووریی ئەگەر هەیە هەتا كاتەكانی شەو و درەنگانی شەو بەردەوام بێت و دواتر كاریگەرییەكەی لاواز دەبێت و كەش بەرەو ئاسایی بوونەوە دەچێت”.
